Sergek ITS ساراپشىلارى تامىز جانە قىركۇيەك ايلارىندا استانا مەن الماتى قالالارىنداعى جول قوزعالىسى جاعدايىن زەرتتەدى. زەرتتەۋ ناتيجەسىندە كۇز كەلگەندە جۇرگىزۋشىلەردىڭ مەجەلى جەرگە ۋاقىتىندا جەتۋى ءۇشىن جولعا 30%-عا كوبىرەك ۋاقىت
جوسپارلاۋى قاجەتتىگى انىقتالدى. بۇل قىركۇيەك ايىندا كەيبىر كوشەلەردە كولىك جىلدامدىعىنىڭ 20-25%-عا تومەندەۋىمەن بايلانىستى، دەپ حابارلايدى aqshamnews.kz.
ايتا كەتەيىك، جاڭا وقۋ جىلىنىڭ باستالۋىمەن تاڭعى قاربالاس ۋاقىتتا كەيبىر كوشەلەردە تامىز ايىمەن سالىستىرعاندا كولىك سانى ەكى ەسە كوبەيگەن.
ماسەلەن، 2 قىركۇيەك كۇنى استانا قالاسىندا تاڭعى 7:00-دە سارايشىك كوشەسىندەگى ورتاشا جىلدامدىق 26 تامىزداعى دۇيسەنبىدەگى كورسەتكىشپەن سالىستىرعاندا 20%-عا تومەندەدى. بۇل كۇنى سارايشىق كوشەسىنە 7،5 مىڭ كولىك ورنىنا 11 مىڭنان استام جۇرگىزۋشى شىققان. ۇقساس جاعداي ەلورداداعى باسقا دا نەگىزگى داڭعىلداردا بايقالدى.
ماسەلەن، ماڭگىلىك ەل داڭعىلىنا شىققان كولىكتەر سانى شامامەن 40%-عا، ال تۇران داڭعىلىندا 30%-عا ارتقان.
الماتى قالاسىندا كولىك قوزعالىسى ەڭ كوپ جۇكتەلگەن داڭعىلدار – ءال-فارابي جانە اباي داڭعىلدارى بولدى. 2 قىركۇيەك كۇنى تاڭەرتەڭ باتىس باعىتتا ءال-فارابي داڭعىلىنا 8 مىڭ كولىك ورنىنا 11 مىڭ كولىك شىعىپ، قوزعالىس جىلدامدىعى 15%-عا تومەندەگەن. ال اباي داڭعىلىندا ەكى باعىتتا دا 17 مىڭ كولىك ورنىنا 23 مىڭ كولىك شىعىپ، قوزعالىس
جىلدامدىعى بىردەن 25%-عا تومەندەگەن.
سونىمەن قاتار، رايىمبەك داڭعىلىندا (14%)، تولە بي كوشەسىندە (20%) جانە شىعىس اينالما جولىندا (14%) كولىك سانىنىڭ وسكەنى بايقالعان. وسىلايشا، وقۋ جىلى باستالعانعا دەيىن جۇرگىزۋشى جولدا شامامەن ءبىر ساعات ۋاقىت جۇمساسا، قازىرگى جىلدامدىق پەن كەپتەلىستەردى ەسكەرسەك، بۇل ۋاقىت شامامەن 1 ساعات 20 مينۋتقا سوزىلادى.
تالداۋ بارىسىندا 26 تامىز بەن 2 قىركۇيەك دۇيسەنبى كۇندەرىندەگى ورتاشا قوزعالىس جىلدامدىعى مەن كولىك سانى سياقتى پارامەترلەر نەگىزگە الىندى. زەرتتەۋگە استانا مەن الماتى قالالارىنىڭ ەڭ جۇكتەلگەن كوشەلەرى ەنگىزىلدى.
ەسكە سالا كەتەيىك، Sergek ITS (Intelligent Transportation System) – بۇل قالاداعى كەپتەلىستەردىڭ سەبەپتەرىن انىقتاۋعا، قوعامدىق كولىك ءۇشىن ءتيىمدى باعىتتار مەن كەستەلەر قۇرۋعا، قالالىق ينفراقۇرىلىمدى جوسپارلاۋدى وزگەرتۋگە، سونداي-اق ادامداردىڭ ماياتنيكتىك كوشى-قونىنىڭ
سەبەپتەرىن تۇسىنۋگە مۇمكىندىك بەرەتىن ينتەللەكتۋالدى كولىك جۇيەسى.