ورتالىق قالالىق كلينيكالىق اۋرۋحاناعا ينفاركتقا كۇدىكتى 45 جاستاعى ناۋقاس شۇعىل تۇردە جەتكىزىلدى. بۇل ونىمەن سوڭعى جىلى ءۇشىنشى رەت بولعان جاعداي.
ينفاركتقا كۇدىكپەن ول العاش رەت وتكەن جىلى دارىگەرلەر الدىڭعى قارىنشالىق ارتەرياعا ستەنت ورناتقان كەزدە ءتۇستى. وسى جىلدىڭ اقپانىندا ناۋقاستىڭ اينالما ارتەرياسىنا تاعى ءبىر ستەنت سالىندى. الايدا ول جاقىندا قايتادان كومەككە جۇگىندى جانە دارىگەرلەر ونۆڭ وڭ جاق كورونارلىق ارتەرياسىن ستەنتتەۋگە ءماجبۇر بولدى.
"ناۋقاس كوپ تامىرلى زاقىمدانۋدان زارداپ شەگەدى، بۇل شۇعىل ستەنتتەۋدىڭ ءجيى جاعدايىن تۇسىندىرەدى. بۇل جولى ول ميوكارد ينفاركتىسى ساتىسىندا جۇرەكتىڭ اۋىرسىنۋىمەن ءتۇستى. جۇرگىزىلگەن كوروناروگرافيا وڭ جاق كورونارلىق ارتەريانىڭ ارتقى ءبۇيىر تارماعىنىڭ 75% ستەنوزىن كورسەتتى. بۇل اتەروسكلەروتيكالىق تۇيىنشەكتىڭ ءىسىنۋى مەن قابىنۋىنا بايلانىستى بولدى، ول جارىلىپ، ترومبوزعا اكەلۋى مۇمكىن ەدى"، - دەپ ءتۇسىندىردى وقكا رەنتگەنحيرۋرگى ەرجان قۇتتىعوجين.
پاسيەنتتىڭ ۋاقتىلى مەديسينالىق كومەككە جۇگىنۋى جانە جۇرگىزىلگەن ستەنتتەۋ تولىق ميوكارد ينفاركتىسىنىڭ الدىن الدى.
"ادامنىڭ جۇرەگىن ەكى سول جانە وڭ كورونارلىق ارتەريا قانمەن قامتاماسىز ەتىلەدى. سول جاق ارتەريا الدىڭعى قارىنشالىق جانە اينالما، ال وڭ جاق ارتقى قارىنشالىق جانە ارتقى بۇيىرلىك تارماقتارعا بولىنەدى. جۇرەكتى قامتاماسىز ەتەتىن بۇل تامىردىڭ بارلىعى ۋاقىت وتە كەلە زارداپ شەكتى جانە ءارقايسىنا ستەنت ورناتۋ قاجەت بولدى"، - دەپ قوستى رەنتگەنحيرۋرگ.
الماتىلىق دارىگەرلەردىڭ ۇيلەسىمدى جۇمىسىنىڭ ارقاسىندا پاسيەنت اۋىر زارداپتان ءۇش رەت قۇتىلىپ، ءقازىر مامانداردىڭ باقىلاۋىمەن قالپىنا كەلىپ جاتىر.