كۇننىڭ سۋۋى، كۇن ساۋلەسىنىڭ جەتىسپەۋشىلىگى مەن تەمپەراتۋراداعى وزگەرىستەر يممۋنيتەتتى تومەندەتەدى.
العاشقى كۇزگى سۋىقتا مەديسينالىق ورتالىقتاردا ناۋقاستار قاراسى ايتارلىقتاي كوبەيەدى: تەراپيەۆت دارىگەرگە تۇرعان كەزەك ارتىپ، جرۆي بەلگىلەرى ءجيى كەزدەسەدى.
نەلىكتەن يممۋنيتەت تومەندەيدى؟
كۇز بەن قىس اعزاعا بىردەن بىرنەشە ءقاۋىپ توندىرەدى:
ۇيقىنىڭ قانباۋى جانە شارشاڭقىلىق. كۇندىزگى جارىقتىڭ قىسقارۋى اعزادان بولىنەتىن، ۇيقىعا جاۋاپ بەرەتىن مەلاتونين گارمونى كولەمىن تومەندەتەدى. ناتيجەسىندە ۇيقى شالا بولىپ، شارشاڭقىلىق سوزىلمالىعا اينالادى، ونىمدىلىك تومەندەيدى.
D3 دارۋمەنىنىڭ تاپشىلىعى. كۇن بولماسا، اعزا كالسييدى ءسىڭىرۋ ءۇشىن قاجەت D3 دارۋمەنىنىڭ بەلسەندى ءتۇرىنىڭ سينتەزىن توقتاتادى. ونىڭ جەتىسپەۋشىلىگى شاشتىڭ، تەرىنىڭ، تىرناقتىڭ جانە ءتىستىڭ كۇيىنە اسەر ەتەدى. دارۋمەن كورسەتكىشتەرىن اناليز تاپسىرۋ ارقىلى تەكسەرۋگە بولادى.
ينفەكسيا ءقاۋپىنىڭ جوعارىلاۋى. ۋلتراكۇلگىن ساۋلە نەعۇرلىم از بولسا، اۋاداعى وزون سوعۇرلىم از بولادى، ياعني ۆيرۋستار مەن باكتەريالار ۇزاققا ساقتالادى. سوندىقتان كۇزدە سۋىق تيۋ ءجيى كەزدەسەدى.
پارازيتتىك ينفەكسيالار. قۇرتتار، پاتوگەندىك باكتەريالار مەن ساڭىراۋقۇلاقتار قورەكتىك زاتتاردى "جەپ"، دەنەنىڭ قورعانىسىن السىرەتەدى. ەگەر ولارعا كۇدىك بولسا، تەست تاپسىرىپ، قاجەت بولعان جاعدايدا ەمدەلۋ كەرەك.
قورعانىستى نىعايتۋعا نە كومەكتەسەدى؟
تاۋەكەلدەردى ازايتۋ جانە يممۋندىق جۇيەگە كومەكتەسۋ قاراپايىم قادامدارمەن جاسالۋى مۇمكىن:
دۇرىس تاماقتانۋ راسيونى. جەيتىن تاماق قۇرامىنا ماۋسىمدىق كوكونىستەر مەن جەمىستەردى قوسىڭىز، ال تاتتىلەردى شەكتەڭىز. ەگەر اسقازان نەمەسە اس قورىتۋ پروبلەمالارى بولسا، دۇرىس تاماقتانۋ جوسپارىن جاساۋ ءۇشىن گاستروەنتەرولوگپەن كەڭەسكەن دۇرىس.
دەنە بەلسەندىلىگى. سپورت، گيمناستيكا نەمەسە ەڭ قۇرىماعاندا كۇندەلىكتى سەرۋەن دەنەنى نىعايتادى جانە ينفەكسيالارعا توزىمدىلىكتى ارتتىرادى.
تولىققاندى ۇيقى. ساپالى دەمالىس ۆيرۋستارمەن كۇرەسۋ قابىلەتىنە تىكەلەي اسەر ەتەدى.
شىمىرلىق. تاڭەرتەڭگىلىك سۋىق دۋشپەن شىنىعۋ دا يممۋنيتەتتى نىعايتۋدىڭ ءبىر جولى. سۋ تەمپەراتۋراسىن بىرتىندەپ تومەندەتۋ ارقىلى دەنەنى ۇيرەتۋگە بولادى.
جامان ادەتتەردەن باس تارتۋ. تەمەكى شەگۋ مەن الكوگول سۋىق تيۋ كەزىندە اعزانى ودان ءارى السىرەتەدى.
دارۋمەندەر مەن بيولوگيالىق بەلسەندى قوسپالار. اعزاعا ارتىق جۇكتەمەنى بولدىرماۋ ءۇشىن دارۋمەنجەر مەن بەلسەندى بيولوگيالىق قوسپالاردى قابىلداۋ كەرەك، ءبىراق ونى الدىمەن دارىگەرمەن كەلىسىپ العان ءجون.
ۇيقىنىڭ ساپاسى مەن مولشەرى ادامنىڭ ونىمدىلىك، ەموسيونالدى جاعداي جانە جالپى دەنساۋلىق كورسەتكىشىن ايقىندايدى.
استانادا 2024–2025 جىلعى ەپيدەميولوگيالىق ماۋسىمدا جەدەل رەسپيراتورلىق ۆيرۋستىق ينفەكسيانىڭ (جرۆي) 260 مىڭنان استام جاعدايى تىركەلدى. ناۋقاستاردىڭ جارتىسىنان استامى – 14 جاسقا دەيىنگى بالالار.