كۇشتىك قۇرىلىم قىزمەتكەرلەرىنىڭ جالاقىسى كوتەرىلمەك

قورعانىسقا قاتىستىنىڭ ءبارى قۇپيا جۇرگىزىلەدى

ەلىمىزدە كۇشتىك قۇرىلىمدار قىزمەتكەرلەرىنىڭ جالاقىسىن كوتەرۋ جوسپارلانىپ وتىر. بۇل تۋرالى قارجى ۆيسە-مينيسترى داۋرەن تەمىربەكوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«قورعانىسقا قاتىستىنىڭ ءبارى قۇپيا جۇرگىزىلەدى. جالپى سوزبەن ايتار بولساق، كۇشتىك قۇرىلىمداردىڭ جالاقىسىن كوتەرۋ جايىندا بولىپ وتىر. وعان قورعانىس مينيسترلىگى، ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى جانە باسقا دا مەملەكەتتىك ورگاندار كىرەدى»، - دەدى داۋرەن تەمىربەكوۆ سەناتتا 2023 جىلعا ارنالعان رەسپۋبليكالىق بيۋدجەتتى ناقتىلاۋ تۋرالى زاڭ جوباسىن تالقىلاۋدان كەيىن ب ا ق وكىلدەرىنىڭ ساۋالىنا وراي.

ءبىراق، ۆيسە-مينيستر ناقتى سيفر ايتا المايتىندىعىن جەتكىزدى.

«مەن اقپارات بەرە المايمىن. ويتكەنى، بۇل قۇپيا اقپارات سانالادى. سەبەبى، قورعانىس شىعىستارىنا قاتىستى بيۋدجەتتىڭ اشىق جانە جابىق بولىگى بار. بۇل تەك قازاقستاندا عانا ەمەس، جالپى تاجىريبە سانالادى. بارلىق ۋاقىتتا دا وسىلاي بولىپ كەلدى جانە بولا دا بەرەدى. كۇشتىك قۇرىلىمدار بارلىق ۋاقىتتا جاريا بولمايدى. مالىمەتتەر بيۋدجەتتىڭ اشىق بولىگىندە دە جوق»، - دەدى ول.