كۇرشىمدە كۇن سۋىق

اۋا رايىنا بايلانىستى اۋداندا تابيعي سيپاتتاعى توتەنشە جاعداي جاريالاندى.

شىعىس قازاقستان وبلىسىنىڭ كۇرشىم اۋدانىندا تابيعي سيپاتتاعى توتەنشە جاعداي جاريالاندى، دەپ حابارلايدى Almaty-akshamy.kz

شقو اكىمدىگى باسپا ءسوز قىزمەتىنىڭ مالىمەتىنشە، 2024 جىلدىڭ 7 قاڭتارىنان باستاپ كۇرشىم اۋدانىندا قار مەن بوران توقتاماي تۇر. كەيبىر جەرلەردە قاردىڭ قالىڭدىعى 1.8-2 مەترگە جەتتى. مارقاكول جانە توسقايىن اۋىلدىق وكرۋگتەرىنىڭ ەلدى مەكەندەرى كولىك قاتىناسىنان اجىراتىلدى.

قاردىڭ ءتۇسۋ نورمالارىنىڭ اسىپ كەتۋىن جانە ەلدى مەكەندەرگە كولىك قاتىناسىنىڭ بولماۋىن ەسكەرە وتىرىپ، كۇرشىم اۋدانىنىڭ اكىمدىگى جەرگىلىكتى اۋقىمداعى تابيعي سيپاتتاعى توتەنشە جاعداي جاريالادى.

"شقو كولىك جانە اۆتوموبيل جولدارى باسقارماسىنىڭ دەرەكتەرى بويىنشا جول ءجۇرۋدى قامتاماسىز ەتۋ ءۇشىن قوسىمشا تەحنيكا جونەلتىلدى. قازىرگى ۋاقىتتا ارنايى تەحنيكانىڭ 24 بىرلىگى جۇمىلدىرىلعان. الايدا بورانعا بايلانىستى جۇمىس ىستەۋ قيىندىق تۋدىرۋدا"، دەدى شقو اكىمدىگىنىڭ باسپا ءسوز قىزمەتىندەگىلەر.

سونداي-اق، كۇرشىم اۋدانىنا قاجەتتى كومەك كورسەتۋ ءۇشىن شقو بويىنشا تج دەپارتامەنتىنىڭ جوعارى وتپەلى تەحنيكاسى كەلدى.

مارقاكول جانە توسقايىن اۋىلدىق وكرۋگتەرى مەكتەپتەرىنىڭ وقۋشىلارى 8 قاڭتاردان باستاپ قاشىقتىقتان وقىتۋ فورماتىنا اۋىستىرىلدى.

قولايلى اۋا-رايى جاعدايلارى بەلگىلەنگەننەن كەيىن، 16 قاڭتاردا اۋىلدىق وكرۋگتەردىڭ تۇرعىندارىنا قاجەتتى ازىق-تۇلىك پەن دارىلىك زاتتاردى جەتكىزۋ ءۇشىن تىكۇشاق جىبەرىلدى.

جاعداي جەرگىلىكتى اتقارۋشى ورگانداردىڭ باقىلاۋىندا.