الماتىلىقتارعا كۋرەرگە «كودتى» تاۋاردى تەكسەرىپ العاننان كەيىن عانا ايتۋ كەڭەسى بەرىلدى
«ۇلتتىق تۇتىنۋشىلار ليگاسى» رەسپۋبليكالىق قوعامدىق بىرلەستىگىنىڭ پرەزيدەنتى سۆەتلانا رومانوۆسكايا الماتى وڭىرلىك كوممۋنيكاسيالار قىزمەتى ۇيىمداستىرعان باسپا ءسوز ءماسليحاتىندا جۋرناليستەردىڭ سۇراقتارىنا جاۋاپ بەردى. ونىڭ ايتۋىنشا، تۇتىنۋشىلارعا اقشانى ايتارلىقتاي ۇنەمدەپ، ساپاسى تومەن تاۋارلارعا ۇرىنىپ قالماۋ ءۇشىن جاپپاي ساتىلىمعا دۇرىس دايىندالۋى كەرەكتىگىن ەسكەرتتى، دەپ حابارلايدى اlmaty-akshamy.kz.
بىرىنشىدەن، رومانوۆسكايا تاۋارلاردى نەسيەگە الۋعا كەڭەس بەرمەيدى. دەگەنمەن ساتىپ العان تاۋاردى ەكى اپتا ىشىندە قايتارۋعا قۇقى بار سەكىلدى تۇتىنۋشىنىڭ نەسيەدەن دە وسى ۋاقىت ىشىندە باس تارتۋىنا مۇمكىندىگى بار.
«تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 14-بابى نەگىزىندە نەسيەدەن باس تارتۋعا بولادى، تەك وسى ەكى اپتا ىشىندەگى پايىزىن تولەيدى. ەگەر ادامداردىڭ نەسيەگە العان تاۋارى ۇناماسا، نەمەسە كوڭىلىنەن شىقپاي قالسا، وسىنى ەستەن شىعارماعاندارى دۇرىس. ەكىنشىدەن، ادامدار تاۋارلاردى قايدان الىپ جاتقانىن تۇسىنگەنى دە وتە ماڭىزدى. سەبەبى الاياقتىق ارەكەتتەر ءجيى كەزدەسەدى. ءقازىردىڭ وزىندە دايىندالىپ، قاجەتتى زات نەمەسە قىزمەت قانشا تۇراتىنىن ءبىلىپ الۋ كەرەك. ونىڭ ءقازىر قانشا تۇراتىنىن جانە «جەڭىلدىكتەر جۇماسىندا» قانشاعا ساتاتىنىن بىلگەن ءجون»، - دەيدى س. رومانوۆسكايا.
ءۇشىنشى فاكتور – ساۋدا ورنىنداعى بارلىق تاۋاردى قاراپ شىعۋ كەرەك دەپ اسىعۋدىڭ قاجەتى جوق، الدىمەن ول زاتتىڭ سىزگە قانشالىقتى قاجەتى بار-جوعىن ناقتىلاپ العانىڭىز ءجون. ساتۋشى تاۋار ساپاسىنا كەپىلدىك بەرەتىنىنە جانە سەنىم تەلەفون نومىرلەرىنىڭ بار-جوعىنا كوز جەتكىزگەنىڭىز ابزال. ەگەر دە تاۋاردى ينتەرنەت-دۇكەندەر ارقىلى ساتىپ العان بولساڭىز، وندا تاۋاردى جەتكىزۋشى كۋرەرگە بىردەن «كودتى» ايتپاڭىز. الدىمەن تاۋاردىڭ ساپاسىن تەكسەرىپ، مۇلكىڭىز كوڭىلگە قونعان كەزدە بارىپ جاسىرىن «كودتى» ايتقان ءجون.
«تۇتىنۋشى تاۋار بەلگىلەرىن ساقتاي وتىرىپ، ونى اقىرىن اشىپ، قاراي الادى. ەگەر كۋرەر ءوزىن جاي عانا جەتكىزۋشى جانە تاۋارعا ەش قاتىسى جوعىن ايتا باستاسا، سەنبەڭىز. ەگەر تاۋار ءسىزدىڭ كوڭىلىڭىزدەن شىققاننان كەيىن كودتى حابارلاڭىز»- دەيدى ساراپشى.