وزبەكستان ءىىم دەلەگاسياسى قازاقستاندىق پوليسيانىڭ سيفرلىق شەشىمدەرىمەن تانىستى
ىشكى ىستەر ءمينيسترىنىڭ ورىنباسارى زۋفار قۇربانوۆ باستاعان وزبەكستان ءىىم دەلەگاسياسى ەلىمىزدىڭ پوليسيا ۆەدومستۆوسىنا كەلدى، دەپ حابارلايدى almaty-akshamy.kz
قوناقتار قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ، ولاردىڭ كونستيتۋسيالىق قۇقىقتارىن ساقتاۋ ءۇشىن پوليسيا جۇمىسىنا ەنگىزىلگەن سيفرلىق شەشىمدەرمەن تانىستى.
شەتەلدىك ارىپتەستەرگە جول ءجۇرىسى قاعيدالارىن بۇزۋشىلاردى انىقتاۋعا كومەكتەسەتىن “قورعاۋ” جۇيەسى كورسەتىلدى، “سيفرلىق پوليسەي” جوباسى اياسىندا الىنعان پوليسيا قىزمەتكەرلەرىنىڭ جاڭا بەينەجەتوندارىنىڭ ەرەكشەلىكتەرى تۋرالى ايتىلدى.
وزبەك دەلەگاسياسىنا بۇكىل ەل بويىنشا وقۋ ورىندارىندا ورناتىلعان بەينەكامەرالار مەن دابىل تۇيمەلەرىنىڭ جۇمىسى، ىشكى كادرلىق پروسەستەردى وڭتايلاندىرۋ جانە پوليسيا قىزمەتكەرلەرىمەن حالىققا كورسەتەتىن مەملەكەتتىك قىزمەتتەردى سيفرلاندىرۋ تانىستىرىلدى.
ايتا كەتەيىك، بۇل جوبالار قۇقىق بۇزۋشىلىقتاردىڭ الدىن الۋدىڭ ءتيىمدى تەتىگى عانا ەمەس، سونىمەن قاتار قىلمىستاردى جەدەل اشۋ قۇرالى رەتىندە دە ارەكەت ەتەدى. ماسەلەن، رەسپۋبليكا بويىنشا كامەرالاردىڭ كومەگىمەن جىل باسىنان بەرى 8 مىڭنان استام قىلمىس اشىلىپ، 465 مىڭ اكىمشىلىك قۇقىق بۇزۋشىلىققا توسقاۋىل قويىلدى، 4،6 ملن جول ءجۇرىسى قاعيداسىن بۇزۋ دەرەگى تىركەلدى.
قوناقتار قالاداعى جەدەل جاعداي تۋرالى اقپاراتتى تاۋلىك بويى ۇزدىكسىز جيناۋ جانە تالداۋ ءۇشىن بەينەباقىلاۋ مۇمكىندىكتەرىن پايدالاناتىن ەلوردالىق جەدەل باسقارۋ ورتالىعىنا باردى. سونداي-اق ولارعا مينيسترلىكتىڭ مولەكۋلالىق-گەنەتيكالىق زەرتحاناسىنىڭ جۇمىسى كورسەتىلدى.
سونىمەن قاتار كورشى مەملەكەتتىڭ ءتارتىپ ساقشىلارى قىلمىستىق-اتقارۋ جۇيەسى كوميتەتىنىڭ احۋالدىق ورتالىعىنىڭ جۇمىسىن زەردەلەدى، وندا ەلدەگى بارلىق پەنيتەنسيارلىق مەكەمەلەردەگى جاعداي باقىلانادى. ساپار اياسىندا وزبەكستان دەلەگاسياسى ەلوردالىق كيبەرپوليسياعا، حقكو مەن ارنايى حقكو-عا باردى.