ىستىقتىڭ بەتى قايتپاي تۇرعاندىقتان جۇرەك قان تامىرلارى اۋرۋلارى اسقىنىپ، ىشەك ينفەكسياسىنىڭ ءورشۋى ءجيى بايقالادى.
رەسمي مالىمەتتەرگە سۇيەنسەك، جىل باسىنان بەرى جەدەل ىشەك ينفەكسياسىنا شالدىققان 108 سىرقات انىقتالعان. ونىڭ ىشىندە 73ء-ى 14 جاسقا دەيىنگى بالا ەكەن. 85 ادام ءتۇرلى ازىق-تۇلىك ارقىلى جۇقتىرعان بولسا، 23 ادام ناۋقاسپەن قارىم-قاتىناستا بولعان.
ۇلتتىق گوسپيتالدىڭ ينفەكسيونيست-دارىگەرى جۇلدىز سەرىك قىزى ىشەك اۋرۋلارىنىڭ تارالۋى ءۇش فاكتوردان تۇراتىنىن ايتادى. مامان-دارىگەر ەڭ الدىمەن تۇتىناتىن تاماق، ىشەتىن سۋ جانە قولدى دۇرىس جۋماۋ دەيدى.
«تازالىققا ءمان بەرىپ، قولدى كۇنىنە بىرنەشە مارتە سابىنداپ جۋعان دۇرىس. دالاداعى جەدەل تاماقتانۋ ورىندارىنان تاماق ىشكەندە وتە ساق بولۋ كەرەك. دۇكەننەن الىناتىن ازىق-تۇلىككە وتە اباي بولىپ، تۇتىنۋ مەرزىمىن تەكسەرگەن ءجون. ءسۇت، شۇجىق، كونسەرۆى ونىمدەرىن ساقتىقپەن قولدانعان دۇرىس. جەمىس-جيدەك پەن كوكونىستەردى پايدالانار الدىندا قايناتىلعان سۋمەن، اس سوداسىن قوسىپ تازالاپ جۋۋ كەرەك. بالالاردى قول جۋۋعا داعدىلاندىرىپ، قالاي جۋۋ كەرەكتىگىن تۇسىندىرگەن ابزال»، – دەيدى ۇلتتىق گوسپيتالدىڭ ينفەكسيونيست-دارىگەرى جۇلدىز سەرىك قىزى.
سونداي-اق دارىگەر جاز ماۋسىمىندا قوناققا بارعاندا مويەنەز قوسىلعان سالاتتار مەن تىسكە باسارلاردى جەۋدەن باس تارتۋدى ۇسىنادى. الدىن-الا دايىندالعان تاعامداردا ۋلانۋ ءجيى بولاتىنىن ەسكەرتەدى.
ال جۇرەك-قان تامىرلارى اۋرۋلارى كۇننىڭ ىستىعىندا بىردەن ءوسىپ، جەدەل جاردەمگە شاقىرۋلار ءجيى تۇسەدى. مۇنداي سىرقاتى بار ادامدار مۇمكىندىگىنشە ىستاقتا دالاعا شىقپاعان ءجون دەيدى دارىگەرلەر.
ۇلتتىق گوسپيتال دارىگەرى اسەمگۇل سايات قىزى تاجىريبەلى دارىگەر رەتىندە ناۋقاس ادامدارعا ەڭ الدىمەن سابىر ساقتاۋعا كەڭەس بەرەدى. قان قىسىمى كوتەرىلگەن نەمەسە جۇرەك سىر بەرگەن جاعدايدا ۋچاسكەلىك دارىگەر بەلگىلەگەن دارىلەردى پايدالانىپ، سوسىن جەدەل جاردەمگە جۇگىنۋدى ۇسىنادى.
«ەگەر دالاعا شىعۋ كەرەك بولعان جاعدايدا باس كيىم كيىپ، كۇننەن بارىنشا قورعانۋ كەرەك. كۇنىنە ەكى ليترگە دەيىن سۋ ىشكەن ءجون. سالقىن دۋش قابىلداپ، جەڭىل تاماقتانۋ قاجەت. اسقازانعا، جالپى اعزاعا كۇش تۇسىرەتىن اۋىر تاعامداردان باس تارتقان دۇرىس. مۇندايدا كوكونىستەر مەن جەمىستەردىڭ پايداسى زور. ۇنەمى جوعارى قان قىسىمىمەن جۇرەتىن ناۋقاستار بىزدە قاۋىپ-قاتەر ايماعىنداعى ادامدار بولىپ سانالادى، سوندىقتان ولاردى ءجيى باقىلاۋدا ۇستايمىز»، – دەيدى اسەمگۇل سايات قىزى.
سالقىن سۋ ءىشىپ، بولماسا كونديسيونەردى ءجيى قولدانىپ سۋىق ءتيىپ جاتقاندار دا بار. دارىگەرلەر اپتاپ ىستىقتا سۋىق تيۋ وتە ءقاۋىپتى ەكەنىن ايتادى. ءتۇرلى سۋسىندار مەن بالمۇزداقتى دا ءوز ورىنىمەن، ابايلاپ تۇتىنعان دۇرىس. ەڭ باستىسى – دەنساۋلىقتى ساقتاۋ ءار ادامنىڭ وزىنە بايلانىستى. دارىگەردىڭ نۇسقاۋىن بۇلجىتپاي ورىنداعان كەزدە عانا جازدىڭ اپتاپ ىستىق كۇندەرىن جەڭىل وتكىزۋگە بولادى.