ۇيقىنىڭ ازدىعى قانت ديابەتى مەن باسقا دا اۋرۋلارعا اكەلۋى مۇمكىن
ۇيقى – دەنساۋلىق كەپىلى. الايدا زاماناۋي ءومىر سالتى كوپ ادامنىڭ جەتكىلىكتى دەمالۋىنا كەدەرگى كەلتىرۋدە. مامانداردىڭ ايتۋىنشا، تاۋلىگىنە بەس ساعاتتان از ۇيىقتاۋ ادام اعزاسىنا ايتارلىقتاي زيان تيگىزەدى.
ۇيقى جەتىسپەۋشىلىگىنىڭ سالدارى
نيەۆروپاتولوگ ۆلاديمير مارتىنوۆتىڭ ايتۋىنشا، كۇندەلىكتى ۇيقىنىڭ از بولۋى – اعزا ءۇشىن اۋىر كۇيزەلىس. بۇل جاعداي بىرنەشە باعىتتا دەنساۋلىققا كەرى اسەر ەتەدى:
• كورتيزول گورمونىنىڭ دەڭگەيى ارتادى؛
• زات الماسۋ پروسەسى بۇزىلادى؛
• يممۋندىق جۇيە السىرەيدى؛
• ەستە ساقتاۋ مەن زەيىن شوعىرلاندىرۋ قابىلەتى تومەندەيدى؛
• جۇرەك-قان تامىرلارى اۋرۋلارى مەن قانت ديابەتىنىڭ دامۋ ءقاۋپى ارتادى؛
• دەپرەسسيا مەن سەمىزدىككە بەيىمدىلىك كۇشەيەدى.
مارتىنوۆتىڭ ايتۋىنشا، مۇنداي زيان ۋاقىت وتە كەلە جينالا بەرەدى، ال دەمالىس كۇندەرى ۇزاق ۇيىقتاپ، بۇل كەمشىلىكتى تولتىرۋ مۇمكىن ەمەس.
ۇزاق ۇيقى دا زيان بولۋى مۇمكىن
سونىمەن قاتار، تەحاس ۋنيۆەرسيتەتىنىڭ (سان-انتونيو) زەرتتەۋشىلەرى تۇنگى ۇيقىنىڭ توعىز ساعاتتان ارتىق بولۋى دا دەنساۋلىققا كەرى اسەر ەتۋى مۇمكىن ەكەنىن انىقتاعان. اتاپ ايتقاندا، بۇل كوگنيتيۆتىك فۋنكسيالاردىڭ – ويلاۋ، ەستە ساقتاۋ قابىلەتتەرىنىڭ – السىرەۋىنە الىپ كەلەدى. بۇل اسەر، اسىرەسە، دەپرەسسيا بەلگىلەرى بار ادامداردا ايقىن بايقالادى.
ساپالى جانە جەتكىلىكتى ۇيقى – دەنە مەن اقىل-ويدىڭ قالىپتى جۇمىس ىستەۋى ءۇشىن ماڭىزدى. ۇيقى رەجيمىن ساقتاپ، كۇندەلىكتى 7–8 ساعات ۇيىقتاۋعا تىرىسۋ – ۇزاق ءارى سالاۋاتتى ءومىردىڭ نەگىزى.