ليۆاندىق ازاماتتىڭ بۇل ونەرتابىسى تازا ەنەرگيانىڭ كومەگىمەن ىستەيدى.
جەرگىلىكتى ونەرتاپقىش كۇن قۋاتىمەن ءتۇرلى تاعام پىسىرەتىن پەش جاساپ شىعارعان. بۇل جاڭالىق تۇرمىسى ناشار حالىقتىڭ جاعدايىن ءبىراز جەڭىلدەتپەك، دەپ حابارلايدى Almaty-akshamy.kz 24.kz-كە سىلتەمە جاساپ.
اۋىر ەكونوميكالىق داعدارىستى باستان كەشكەن ليۆاندا جانارماي تاپشى. وسىنىڭ كەسىرىنەن ەلەكتر ەنەرگياسىنىڭ ءوندىرىسى كۇرت ازايىپ، كۇنىنە تەك بىرنەشە ساعات جارىق بەرىلەدى. كاسىپورىندار مەن اۋرۋحانالار جابىلا باستادى. اسىرەسە، ناۋبايحانالاردىڭ جاعدايى ءماز ەمەس. نان مەن توقاشتاردى دايىنداۋ ءۇشىن ەلەكتر ەنەرگياسى قاجەت. ال ديزەلدى گەنەراتورلارعا قۇياتىن جەر مايى جوق. تۇرعىندار امالىن تاۋىپ، ۇيلەرىنىڭ شاتىرلارىنا كۇن باتارەيالارىن ورناتىپ جاتىر. ليۆاندا جىلىنا ورتا ەسەپپەن 300 كۇن شۋاقتى بولىپ تۇرادى. جەرگىلىكتى ونەرتاپقىش تۋفيك حامدان كۇن قۋاتىمەن ىستەيتىن پەشتى ويلاپ تاۋىپ، وسى ماسەلەنى شەشپەك.
«سۇيىق ماي وسى اينالاردان ءوتىپ، 300-400 گرادۋسقا دەيىن قىزادى. بۇل جىلۋىن تاعام مەن سۋسىندار دايىنداۋ ءۇشىن قولدانامىز. نان، كرۋاسسان سەكىلدى وسىنداي تەمپەراتۋرادا پىسەتىن بارلىق ءونىمدى شىعارا الامىز»، - دەيدى كومپانيانىڭ نەگىزىن قالاۋشى تۋفيك حامدان.
تاجىريبە رەتىندە العاشقى پەشىن رەمحالا اۋىلىنداعى ناۋبايحانادا ورناتتى. سونىڭ ارقاسىندا ول ايىنا 10 توننا وتىن ۇنەمدەگەنىن ايتادى.
«ديزەل وتىنىن ۇنەمدەۋمەن قاتار ءونىمىمىزدىڭ دە ساپاسى ارتتى. ويتكەنى تازا جىلۋدى قولدانامىز، وتىنىڭ ءيىسى جوق. مەملەكەت ءبىزدى ەلەكتر قۋاتىمەن قامتىمايدى، گەنەراتورلارعا تاۋەلدىمىز. ال وتىنىنىڭ باعاسى شارىقتاپ كەتتى»، - دەيدى ناۋبايحانا يەسى ۆيسسام شامسەددين.
بۇل جوبا ەلدەگى الەۋمەتتىك احۋالدى جاقسارتاتىن ءتۇرى بار. ويتكەنى ارەڭ كۇنىن كورىپ جۇرگەن جۇرتقا ناننىڭ قىمباتتاۋى اۋىر ءتيدى.
«بۇل پەش ناۋبايحانا يەلەرىنە ديزەل وتىنىنا جۇمسايتىن قاراجاتىنىڭ 80 پروسەنتىن ۇنەمدەيدى. سايكەسىنشە، ناننىڭ باعاسى دا ارزاندايدى. وكىنىشكە وراي، داعدارىس كەزىندە كوپتەگەن ادام ارەڭ كۇنىن كورىپ وتىر. سوندىقتان نان ءوندىرۋدىڭ وزىندىك قۇنىن ازايتىپ، ازاماتتارىمىز تۇتىناتىن ازىق-تۇلىك باعاسىن دا تومەندەتە الامىز»، - دەيدى كومپانيا مەنەدجەرى حيتاف گازال.
جوبا ءساتتى جۇزەگە اسسا، ەل كولەمىندە ىسكە قوسۋ كوزدەلىپ وتىر. سونداي-اق 2030 جىلعا دەيىن بارلىق ازىق-تۇلىك پەن سۋسىندار شىعاراتىن كاسىپورىنداردى تازا ەنەرگياعا اۋىستىرۋ جوسپاردا بار.