N26 قالالىق ەمحاناسىنىڭ جالپى تاجىريبەلىك دارىگەرى انەل دوسبودا جىلۋ جۇرەك-قانتامىر جۇيەسى ءۇشىن وتە ءقاۋىپتى ەكەنىن، ءتىپتى جاس جىگىت ىستىق كۇندە جىلۋ سوققىسىنان ءولۋى مۇمكىن ەكەنىن اتاپ ءوتتى، دەپ حابارلايدى Almaty-akshamy.kz.
«ارتىق سالماق پەن كوبىنە وتىرىپ جۇمىس ىستەيتىن ادامدار، 75 جاستان اسقاندار، نارەستەلەر مەن جۇكتى ايەلدەر ەڭ وسال بولىپ تابىلادى. سپورتشىلار، اۋىر فيزيكالىق ەڭبەكپەن اينالىساتىندارعا دا تەز كۇن ءوتىپ كەتۋى مۇمكىن. سونىمەن قاتار جۇرەك اۋرۋى، جوعارى قان قىسىمى، قانت ديابەتى، بۇيرەك اۋرۋى، پسيحياتريالىق بۇزىلۋلار سياقتى اۋرۋلارى بار ادامداردىڭ دا ساق بولعانى ابزال»، - دەپ قوستى دارىگەر.
جازدىڭ ىستىق كۇندەرىندە دارىگەر ءوزىن ۋلتراكۇلگىن ساۋلەلەردىڭ اسەرىنەن قورعاۋعا كەڭەس بەرەدى. ىستىقتا فيزيكالىق بەلسەندىلىكتى ازايتۋ، سالقىن بولمەدە ۇزاق تۇرۋ، كوپ سۋ ءىشۋ، تابيعي ماتادان جاسالعان كەڭ كيىم كيۋ جانە باسىڭىزعا باس كيىم كيۋ قاجەت. كۇن استىندا كوپ سەرۋەندەۋدەن اۋلاق بولىڭىز. اسىرەسە تاڭعى ساعات 11:00 مەن 15:00 ارالىعىندا كۇن استىنا شىعۋ وتە ءقاۋىپتى بولىپ ەسەپتەلەدى.
ەگەر كۇن ءوتىپ كەتسە، ءبىرىنشى كەزەكتە دەنەدە وتتەگىنىڭ قالىپتى جاعدايدا بولۋىن جانە جىلۋ الماسۋدى قالپىنا كەلتىرۋ قاجەت.
«ارتىق، كەدەرگى كەلتىرەتىن كيىمدى شەشىڭىز. مۇمكىن بولسا، دەنەڭىزدى سۋمەن سالقىنداتىڭىز. ودان دا جاقسىسى، دىمقىل سۇلگىمەن نەمەسە مايلىقپەن باسىڭىزعا كومپرەسس جاساڭىز. بۋلانعان سۋ تەمپەراتۋرانى تومەندەتۋگە كومەكتەسەدى. ەگەر سەرگىتەتىن سالقىن دۋش قابىلداۋ مۇمكىندىگى بولسا -- ونى دەرەۋ جاساڭىز! نەگىزگى مىندەت-دەنەنى سالقىنداتۋ»، - دەيدى مامان.
ەگەر ادامنىڭ جاعدايى جاقسارماسا جەدەل جاردەم شاقىرۋعا نەمەسە ونى اۋرۋحاناعا جەتكىزۋگە مامان كەڭەس بەرەدى.