2023 جىلدىڭ باسىنان بەرى 2021 – 2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە 15 148 ادام «كۇمىس جاس» جوباسى بويىنشا جۇمىسقا ورنالاستىرىلدى، دەپ حابارلايدى Almaty-akshamy.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2023 جىلى وسى باعىت بويىنشا بارلىعى 14 295 ادامدى جۇمىسقا ورنالاستىرۋ جوسپارلانعان بولاتىن.
50 جاستان اسقان جانە زەينەتكەرلىك جاسقا دەيىنگى جۇمىسسىز ازاماتتار اتالعان جوباعا قاتىسا الادى. جوباعا قاتىسۋ ءۇشىن مانساپ ورتالىعىنا ءوتىنىش بەرۋ قاجەت.
«كۇمىس جاس» جوباسىن قارجىلاندىرۋدى ەڭبەك موبيلدىلىگى ورتالىعى جۇمىس بەرۋشىنىڭ جوبا شەڭبەرىندە جۇمىسقا ورنالاستىرىلعان جۇمىسسىزدارعا ەڭبەكاقى تولەۋگە جۇمساعان شىعىندارىنىڭ ءبىر بولىگىن وتەۋگە سۋبسيديالار بەرۋ جولىمەن جۇزەگە اسىرادى.
سۋبسيديالاردىڭ مولشەرى جۇمىستىڭ ءبىرىنشى جىلىندا جالاقى مولشەرىنىڭ 70 %-ىن (ءبىراق 30 اەك-تەن اسپايتىن)، جۇمىستىڭ ەكىنشى جىلىندا جالاقى مولشەرىنىڭ 65 %-ىن (ءبىراق 30 اەك-تەن اسپايتىن)، جۇمىستىڭ ءۇشىنشى جىلىندا جالاقى مولشەرىنىڭ 60 %-ىن (ءبىراق 30 اەك-تەن اسپايتىن) قۇرايدى.
«كۇمىس جاس» جوباسىنا قاتىسۋ مەرزىمى اياقتالعاننان كەيىن جۇمىس بەرۋشى زەينەتكەرلىك جاسقا تولماعان ادامدى كەمىندە 1 جىل مەرزىمگە سونداي-اق زەينەتالدى جاستاعى ازاماتتى زەينەتكەرلىككە شىققانعا دەيىن تۇراقتى جۇمىسپەن قامتۋعا مىندەتتى.
«كۇمىس جاس» جوباسى بويىنشا جۇمىسقا ورنالاسقانداردىڭ ەڭ كوپ سانى تۇركىستان (2103 ادام)، الماتى (1098 ادام)، قاراعاندى (1092 ادام) جانە اقتوبە (1056 ادام) وبلىستارىندا بايقالادى.
قازاقستاندىقتاردىڭ كوبى جوباعا وڭ باعاسىن بەرۋدە.
«مەنىڭ جاسىم 57-دە، ينجەنەر ماماندىعىن يگەرگەنمىن. جۇمىسسىز بولعاندىقتان مانساپ ورتالىعىنىڭ كومەگىنە جۇگىندىم. وندا جۇمىسقا ورنالاسۋدىڭ بىرنەشە نۇسقالارى ۇسىنىلدى، سونىڭ ىشىندە «كۇمىس جاس» جوباسى دا بولدى. مەن «دەدال» ج ش س وقۋ ورتالىعىندا العاشقى قىسقا مەرزىمدى وقۋدان ءوتتىم، سودان كەيىن سول فيرماعا ارنايى كيىم تىگۋشى بولىپ جۇمىسقا ورنالاستىم»، – دەدى قاراعاندىلىق ۆلاديمير كيم.
جوباعا قاتىسۋشىنىڭ ايتۋىنشا، «كۇمىس جاس» جوباسى وعان ءوزىن سۇرانىسقا يە جۇمىسشى رەتىندە سەزىنۋگە مۇمكىندىك بەردى.
بۇگىنگى كۇندە قاراعاندى وبلىسىندا «كۇمىس جاس» جوباسى بويىنشا 1092 ادام جۇمىسپەن قامتىلىپ، ونىڭ 82ء-سى تۇراقتى جۇمىس ورىندارىنا ورنالاستىرىلدى.