الماتىدا جوعالعان بوكسشى تابىلدى

بەلگىلى بوكسشىنىڭ جوعالعانى تۋرالى بۇدان بۇرىن حابارلاعانبىز.

تانىمال قازاقستاندىق بوكسشى سەرىك نۇرقازوۆ ءتىرى تابىلدى، ول ءقازىر تۋىستارىنىڭ قامقورلىعىندا، دەپ حابارلايدى Almaty-akshamy.kz

الماتى پوليسيا دەپارتامەنتىنىڭ باسپا ءسوز قىزمەتى حابارلاعانداي، مەدەۋ اۋدانىندا جوعالىپ كەتكەن بۇرىنعى سپورتشى سەرىك نۇرقازوۆ 26 جەلتوقساندا ءتىرى تابىلدى.

"1959 جىلى تۋعان ازامات نۇرقازوۆ سەرىك امان-ەسەن تابىلدى. ول تۋىستارىنا تاپسىرىلدى. بۇرىن حابارلانعانداي، جوعالعان ازاماتتىڭ قايدا ەكەنىن انىقتاۋ ماقساتىندا ارنايى جەدەل-ىزدەستىرۋ توبى قۇرىلدى"، - دەپ حابارلادى پوليسيا.

سەرىك نۇرقازوۆ 14 جەلتوقساننان بەرى ىزدەۋدە بولعان، ونىڭ جوعالىپ كەتكەنى تۋرالى "قوعام" ىزدەستىرۋ توبىنىڭ ەرىكتىلەرى حابارلاعان. مەدەۋ اۋدانىنداعى 64 جاستاعى ەر ادام ۇيىنەن شىعىپ كەتىپ، قايتىپ ورالماعان.

سەرىك نۇرقازوۆ – قازاقتىڭ اتاقتى بوكسشىسى. ول 1980 جىلدارى كسرو قۇراماسىندا ويناعان. ەل بىرىنشىلىگىنىڭ ءۇش دۇركىن چەمپيونى، ەۋروپا چەمپيونى، گاۆاناداعى الەم چەمپيوناتىنىڭ جانە حالىقارالىق دوستىق ءتۋرنيرىنىڭ كۇمىس جۇلدەگەرى، كسرو-نىڭ ەڭبەك سىڭىرگەن سپورت شەبەرى. سپورتتىق مانسابىن اياقتاعاننان كەيىن بوكستان بالالار جاتتىقتىرۋشىسى بولدى، وبلىستىق وقۋ-جاتتىعۋ ورتالىعىنىڭ مەڭگەرۋشىسى – وبلىستىق جوعارى سپورت شەبەرلىگى مەكتەبىنىڭ ديرەكتورى قىزمەتتەرىن اتقاردى.