توتەنشە جاعدايلار ۆيسە-مينيسترى بولعان يبراگيم كۇلشىمبايەۆ بوستاندىققا شىقتى
اپەللياسيالىق سوت توتەنشە جاعدايلار مينيسترلىگىنىڭ بۇرىنعى ورىنباسارى يبراگيم كۇلشىمبايەۆقا قاتىستى ۇكىمدى وزگەرتتى. وعان بيلىكتى اسىرا پايدالاندى دەگەن ايىپ تاعىلعان بولاتىن. كۇلشىمبايەۆ قاراعاندىدا ۇلىنا ءۇي سالۋ ءۇشىن اسكەريلەردى ماجبۇرلەگەنى ءۇشىن ايىپتالعان ەدى، دەپ حابارلايدى aqshamnews.kz.
بۇگىن استاناداعى اسكەري سوت كۇلشىمبايەۆتىڭ ءىسىن قايتا قاراستىرىپ، ونىڭ ارەكەتىن «بيلىكتى اسىرا پايدالانۋ» باپتان «قىزمەت بابىن اسىرا پايدالانۋ» بابىنا اۋىستىردى. وسىعان بايلانىستى كۇلشىمبايەۆقا قاتىستى ۇكىم وزگەرتىلىپ، باس بوستاندىعىنان ايىرۋدىڭ ورنىنا بوستاندىعىن شەكتەۋ جازاسى بەرىلدى. سوت القاسى بۇرىنعى گەنەرال-مايوردى سوت زالىنان بوساتۋ تۋرالى شەشىم شىعاردى.
«سوت القاسى شەشىم قابىلدادى: 2024 جىلعى 6 تامىزداعى اقمولا گارنيزونىنىڭ اسكەري سوتىنىڭ يبراگيم كۇلشىمبايەۆقا قاتىستى ۇكىمىن وزگەرتۋ. كۇلشىمبايەۆتىڭ ارەكەتىن قازاقستان رەسپۋبليكاسى قىلمىستىق كودەكسىنىڭ 450-بابىنىڭ 1-بولىگىنە سايكەس قايتا سارالاپ، وعان ءۇش جىل مەرزىمگە بوستاندىعىن شەكتەۋ جازاسى تاعايىندالسىن. سونداي-اق، پروباسيالىق باقىلاۋ ورناتىلىپ، تۇراقتى جۇمىسى نەمەسە وقۋى بولماعان جاعدايدا ءماجبۇرلى تۇردە جىل سايىن 100 ساعات ەڭبەككە تارتىلسىن»، — دەپ ۇكىمدى جاريالادى سوت ءتوراعاسى رامازان حاسەنوۆ.
الايدا اپەللياسيالىق سوت ءبىرىنشى ينستانسيانىڭ كۇلشىمبايەۆتىڭ كىناسى تولىق دالەلدەنگەنى تۋرالى شەشىمىمەن كەلىستى.
ەسكە سالا كەتەيىك، ەكس-ۆيسە-مينيستر بەس جىلعا باس بوستاندىعىنان ايىرىلعان بولاتىن. سوت ماتەريالدارىنا سايكەس، توتەنشە جاعدايلار مينيسترلىگىنىڭ جوعارى لاۋازىمدى قىزمەتكەرى تەك اسكەريلەردى ۇلىنىڭ ءۇيىن سالۋعا ماجبۇرلەپ قانا قويماي، اۆتوماتتى قاقپالار مەن بەينەباقىلاۋ كامەرالارىن ساتىپ الۋدى دا تالاپ ەتكەن.