دجو بايدەن بۇۇ الدىندا سوڭعى رەت اقش پرەزيدەنتى رەتىندە ءسوز سويلەدى
بايدەن ءوزىنىڭ اقش پرەزيدەنتى رەتىندەگى سوڭعى ءسوزىن بۇۇ-نىڭ 79-شى سەسسياسىندا جاسادى. بۇل جولى ونىڭ بايانداماسىنىڭ باستى تاقىرىبى ۋكراينا مەن تاياۋ شىعىستاعى قاقتىعىستار بولدى.
پرەزيدەنتتىڭ ايتۋىنشا، ۋكراينا ءادىل ءارى تۇراقتى بەيبىتشىلىككە قول جەتكىزگەنگە دەيىن قولداۋدى قاجەت ەتەدى، ال تاياۋ شىعىستا جاعدايدىڭ شيەلەنىسۋىنە قاراماستان، ديپلوماتيالىق شەشىمدەرگە مۇمكىندىك بار.
«مەن بارشاڭىزدى ۋكراينامەن يىق تىرەسىپ بىرگە بولۋعا شاقىرامىن. پۋتين بۇل سوعىستا جەڭىلىس تاۋىپ جاتىر، ويتكەنى ۋكراينا ەركىندىگىن ساقتاپ قالدى! ول ناتو-نى السىرەتۋدى كوزدەگەنىمەن، ءقازىر ناتو بۇرىنعىدان دا ءبىرتۇتاس. ءبىز ۋكرايناعا قولداۋ كورسەتۋدى توقتاتپاۋىمىز كەرەك. بۇۇ جارعىسىنا سايكەس، ۋكرايناعا تۇراقتى بەيبىتشىلىك ورناتۋعا كومەكتەسۋ ءۇشىن بار كۇشىمىزدى سالۋىمىز قاجەت»، — دەپ مالىمدەدى بايدەن.
سونىمەن قاتار، ول بۇۇ مەن قاۋىپسىزدىك كەڭەسىنە دە وزگەرىستەر ەنگىزۋ كەرەكتىگىن ايتتى:
«ءبىز كۇشتى، ءتيىمدى جانە ينكليۋزيۆتى بۇۇ قۇرۋىمىز قاجەت. بۇل ۇيىم جاڭا داۋىستار مەن جاڭا كوزقاراستاردى تىڭداپ، سوعان بەيىمدەلۋى ءتيىس. سوندىقتان ءبىز قاۋىپسىزدىك كەڭەسىن رەفورمالاۋدى جانە ونى كەڭەيتۋدى قولدايمىز. العا جىلجيتىن ۋاقىت كەلدى، قاۋىپسىزدىك كەڭەسى ءوزىنىڭ باستى مىندەتى — بەيبىتشىلىكتى ورناتۋعا قايتا ورالۋى كەرەك»، — دەدى بايدەن.
ءسوزىنىڭ سوڭىندا بايدەن ەكىنشى مەرزىمگە ۇمىتكەر بولمايتىنى تۋرالى شەشىمىنىڭ سەبەبىن ءتۇسىندىردى:
«مەنىڭ پرەزيدەنتتىگىمنىڭ باستى ماقساتى — دەموكراتيانى قورعاۋ بولدى. بيىلعى جازدا مەن پرەزيدەنت رەتىندە ەكىنشى مەرزىمگە تۇسەمىن بە دەگەن سۇراقتى شەشۋىم كەرەك ەدى. بۇل وڭاي شەشىم بولمادى، پرەزيدەنت بولۋ — مەنىڭ ومىرىمدەگى ەڭ ۇلكەن قۇرمەت. كوپ نارسەنى جۇزەگە اسىرعىم كەلەتىن... ءبىراق جۇمىسقا دەگەن سۇيىسپەنشىلىگىمنەن دە ەلگە دەگەن ماحابباتىم ارتىق»، — دەپ تۇيىندەدى بايدەن.