ساحنالانعان سپەكتاكلدىڭ سارىنى مەن ءستيلى ادەتتەگىدەن ەرەكشە.
«الماتىداعى التىن كۇز قازاقكونسەرتپەن بىرگە» جوباسى اياسىندا «Astana Musical» مەملەكەتتىك تەاترى الماتىلىلىقتارعا گاسترولدىك ساپارمەن تابان تىرەدى، دەپ حابارلايدى Almaty-akshamy.kz
تەاتر ۇجىمى قالا تۇرعىندارى مەن قوناقتارىنىڭ نازارىنا ر.كۋنيدىڭ «№13» كومەدياسىن ۇسىندى.
كومەديالىق تۋىندى كورەرمەننىڭ كوڭىلىن سەرگىتىپ، تاماشا اسەر قالدىردى. كۇلكى مەن شىتىرمان وقيعاعا تولى كومەديانىڭ قويۋشى رەجيسسەرى ەسلام ءنۇرتازيننىڭ ايتۋىنشا، «№13» پەساسى – سوڭعى ونجىلدىقتاعى ەڭ ۇزدىك كومەديالاردىڭ ءبىرى. رەي كۋنيدىڭ بۇل تىرناقالدى تۋىندىسى 1991 جىلى ۇزدىك اعىلشىن كومەدياسى رەتىندە وليۆە لوۋرەنس اتىنداعى سىيلىقپەن ماراپاتتالعان.
ەلوردالىق تەاتردىڭ رەپەرتۋارىنا قوسىلعان «№13» كومەديانىڭ وقيعا جەلىسى قوناق ۇيدەگى №13 بولمەدە كورىنىس تابادى. سيۋجەتتىڭ يرونيالىق ساتيراسى ءۇش كەيىپكەردىڭ اينالاسىندا ءوربيدى. باستى ەكەۋى – بەدەلدى ساياساتكەر مەن ونىڭ حاتشىسى. ءۇشىنشىسى – ەكى كوڭىلدەستىڭ كەزدەسۋىن بۇزعان قاراقشىنىڭ ءمايىتى.
ەڭ باستىسى، ابىرويىنا نۇقسان كەلتىرمەۋدى كوزدەگەن كەيىپكەرلەر مايىتتەن تەز قۇتىلۋدىڭ امالىن ىزدەيدى. سپەكتاكلدەگى قايتالانباس سيۋجەت، ءبىر مەزەتتىك ۇرەي، مانساپقورلىقتىڭ كەسىرىنەن ورىن الاتىن شەكسىز بىلىق ادام بولمىسىنىڭ شىنايى تابيعاتىن اشا تۇسەدى.
قويىلىم باستالىسىمەن ەزۋىنە كۇلكى ۇيىرىلگەن كورەرمەندەر «استانا ميۋزيكل» تەاترىنا جىلى لەبىزدەرىن ءبىلدىرىپ، بارلىق وبرازداردىڭ شەبەر سومدالعانىن جەتكىزدى. تىرشىلىكتىڭ كۇيلەۋى، كۇنكورىستىڭ يلەۋىنەن بوساپ، ريزاشىلىقپەن تاماشالاعان جەڭىل ءارى كوڭىلدى سپەكتاكل كورەرمەندەردىڭ جادىندا ەرەكشە ساقتالىپ قالارى ءسوزسىز.
قويىلىم تەاتردىڭ جەتەكشى ارتىستەرى م.ەسقالي، ا.ءومىرزاقوۆ، ا.اقيپبايەۆ، ا.قاپيزوۆ، ز.تاشتايەۆا، ا.جاماش، ا.قۇسايىنوۆا، ز.جاكەنوۆا جانە ب.باعىتجانوۆتاردىڭ اكتەرلىك ويىندارىمەن ادەمى ورىلگەن.