الماتى اكىمدىگى ديزەلدى قوعامدىق كولىكتى ساتىپ الۋعا تىيىم سالدى.
الماتىدا ەكوجۇيەنى باقىلاۋ بەكەتتەرىنىڭ سانى 16-دان 40-قا دەيىن ارتتى. بۇل تۋرالى ەكولوگيا ءمينيسترى سەرىكقالي برەكەشيەۆ قالا تۇرعىندارىمەن كەزدەسۋدە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
حالىقپەن كەزدەسۋ بارىسىندا قالانىڭ ەكولوگيالىق جاعدايى بويىنشا كوپتەگەن ماسەلە تالقىلاندى.
مينيستر الماتى بىرنەشە جىلدان بەرى ەڭ لاستانعان قالالار تىزىمىنە ەنىپ كەلگەنىن ايتتى. جىل سايىن قالا اتموسفەراسىنا شامامەن 138،7 مىڭ توننا لاستاۋشى زاتتار شىعارىلادى. لاستانۋ جىلۋ كوزدەرىنىڭ (جەو-2 جانە جەو-3)، جەكە تۇرعىن ۇيلەردىڭ جانە ترانسپورتتىڭ شىعارىندىلارىمەن بايلانىستى. بۇدان بولەك، الماتى قالاسىنىڭ اتموسفەرالىق اۋاسىنىڭ جاي-كۇيىنە الماتى وبلىسىنىڭ ءۇش ىرگەلەس اۋداندارىنداعى گازداندىرىلماعان وڭىرلەردىڭ شىعارىندىلارى تەرىس اسەر ەتۋدە.
بيىلعى 9 ايدا ەل بويىنشا اتموسفەراعا 900 مىڭ تونناعا جۋىق لاستاۋشى زات شىقسا، سونىڭ 31،9 مىڭ تونناسى الماتى ۇلەسىندە. 2021 جىلدىڭ ءتيىستى كەزەڭىمەن سالىستىرعاندا ەل بويىنشا شىعارىندىلار 18% تومەن (1،1 ملن توننا)، الماتىدا - 28،4% تومەن (44،6 مىڭ توننا).
سونداي-اق س.برەكەشيەۆ قالانىڭ ەكولوگيالىق جاعدايىن جاقسارتۋ جونىندەگى شارالار كەشەنى الماتىلىقتاردىڭ پىكىرلەرىن ەسكەرە وتىرىپ جاسالعانىن اتاپ ءوتتى. وسى ورايدا، قالاداعى ەكوجۇيەنى باقىلاۋ بەكەتتەرىنىڭ سانى 16-دان 40-قا دەيىن ارتتى. بارلىق جاڭا بەكەتتەردى قوعامدىق ۇيىمداردىڭ كۇشتەرى ۇيىمداستىرىپ، قازگيدرومەتتىڭ ءبىرىڭعاي مونيتورينگ جەلىسىنە بىرىكتىرىلدى (11 بەكەت – ەكو ساراپشى، 10 داچيك – پاۆەل پلوتيسىن، 3 بەكەت – سكايماكس). سونداي-اق الماتى قالاسىنىڭ اكىمدىگى ازيا دامۋ بانكىنىڭ كومەگىمەن قازگيدرومەتتىڭ AirKZ موبيلدىك قوسىمشاسىمەن ينتەگراسيالانعان تاعى 50 داچيك ورناتادى.
الماتى اكىمدىگى ديزەلدى قوعامدىق كولىكتى ساتىپ الۋعا تىيىم سالدى. ءقازىردىڭ وزىندە 827 ەلەكتر جانە گاز اۆتوبۋستارى ساتىپ الىندى. وسى جىلدىڭ سوڭىنا دەيىن ەكولوگيالىق تازا قوعامدىق كولىكتىڭ جالپى سانى 40% قۇرايتىن بولادى. ال بەس جىل ىشىندە قالالىق كولىكتى تولىعىمەن گاز بەن ەلەكتر ەنەرگياسىنا اۋىستىرۋ جوسپارلانۋدا.