قازاقستاننىڭ حالىق ءارتىسى ماقپال ءجۇنىسوۆا الەۋمەتتىك جەلىدەگى پاراقشاسىندا ۆيدەو جاريالاپ، پروديۋسەر بايان الاگوزوۆاعا ارنايى ءوتىنىش جاسادى، دەپ حابارلايدى اqshamnews.kz ءتىلشىسى.
ونەر جۇلدىزى مارقۇم كومپوزيتور ارمان دۇيسەنوۆتىڭ جۇبايى ايسۇلۋدىڭ قيىن جاعدايعا تاپ بولعانى تۋرالى ايتىلعان ۆيدەولاردىڭ كوپشىلىككە اۋىر ءتيىپ جاتقانىن جەتكىزدى.
«ايسۇلۋ حانىم ءۇيىم جوق، دالادا قالدىم دەپ ايتىپ جاتىر. ول ءبارىمىزدىڭ جۇرەگىمىزگە باتادى. قولىمنان كەلسە ءوزىم-اق الىپ بەرەر ەدىم، ءبىراق ميلليونەردىڭ ايەلى ەمەسپىن، ارتىق اقشام جوق. سول ءۇشىن اكىمدىكتىڭ جىگىتتەرىنە حابارلاسىپ، قانداي كومەك بەرۋگە بولاتىنىن سۇرادىم. ءبىراق اكىمدىك بالانسىندا ءۇي جوق ەكەنىن ءبىلدىم. «ءۇي بەرە قويۋى قيىن» دەگەندى دە ەستىدىم»، – دەدى ماقپال ءجۇنىسوۆا.
ءانشى وسى رەتتە بىردەن سەنىم ارتاتىن جالعىز ادامنىڭ بايان ماقسات قىزى ەكەنىن اتاپ ءوتتى.
«ارمان دۇيسەنوۆ باياندى قاتتى سىيلايتىن. قاشان كورسەڭ، جوعارى باعالاپ وتىراتىن. ونىڭ كوپ جوباسىندا ەڭبەك ەتتى، “كەشيۋدىڭ” اندەرىن جازدى. “دوسىم” دەپ ايتاتىن. سول ءۇشىن وسى ماسەلەنى بايان عانا تۇسىنەدى دەپ ويلايمىن. جولداسى ەكەۋى اقىلداسىپ، ءبىر شەشىم قابىلدار دەگەن ۇمىتتەمىن. بايانجان، قولدان كەلسە بىردەڭە قىلىپ ءبىر ءۇي الىپ بەرسەڭدەر ابىرويلارىڭىز ودان سايىن وسەدى. جارتى اقشاسىن ءوزىمىز جيناۋعا تىرىسارمىز. ەكى تويعا بارىپ، تۇسەتىن قاراجاتتى كومەگىم رەتىندە بەرەيىن»، - دەدى حالىق ءارتىسى.
ول سونىمەن بىرگە «حالىقتان اقشا جيناۋ ۇيات بولار» دەپ، بۇل ءىستىڭ قايىرىمدىلىق ەمەس، دوستىق پەن سىيلاستىق دەڭگەيىندە شەشىلگەنىن قالايتىنىن ايتتى.
ايتا كەتەيىك، 2023 جىلى 24 قاڭتاردا قازاقستاننىڭ ەڭبەك سىڭىرگەن قايراتكەرى، كومپوزيتور، پروديۋسەر ءارى تەلەجۇرگىزۋشى ارمان دۇيسەنوۆ ومىردەن وتكەن ەدى.