قازاقستاندا تانىمال بلوگەر Mellstroy-عا قاتىستى ىزدەۋ جاريالاندى. بۇل اقپارات قارجى مونيتورينگى اگەنتتىگى قوزعاعان ىزدەۋ ءىسى بويىنشا باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ پورتالىندا جاريا بولدى، دەپ حابارلايدى اqshamnews.kz.
سوت بلوگەرگە قاتىستى «قاماۋدا ۇستاۋ» تۇرىندەگى بۇلتارتپاۋ شاراسىن سانكسيالاعان.
اگەنتتىك Mellstroy-دىڭ قازاقستان اۋماعىنداعى ينتەرنەت پايدالانۋشىلارىن دا نىساناعا العان زاڭسىز ونلاين-كازينو — “Mellstroy.game” پلاتفورماسىن جارنامالاعانى ءۇشىن كۇدىككە ىلىنگەنىن اتاپ ءوتتى.
بلوگەر الەۋمەتتىك جەلىلەردە كەڭ اۋقىمدى جارنامالىق كامپانيا ۇيىمداستىرىپ، ءتۇرلى ۇتىس ويىندارى مەن چەللەندجدەر جاريالاعان. قاتىسۋشىلارعا TikTok، YouTube Shorts جانە باسقا دا پلاتفورمالاردا كازينو اتاۋىن، لوگوتيپتەرىن جانە سايت سىلتەمەلەرىن كورسەتەتىن ۆيدەولار ءتۇسىرۋ ۇسىنىلعان.
رەسمي مالىمەتتەرگە سايكەس، Mellstroy بۇعان دەيىن رەسەيدە تىكەلەي ەفير كەزىندە ادامدى ۇرىپ-سوققانى ءۇشىن جاۋاپكەرشىلىككە تارتىلعان. ال 2025 جىلدىڭ قاراشاسىندا مينسك قالالىق سوتى ونىڭ بارلىق كانالدارى مەن لوگوتيپتەرىن ەكسترەميستىك ماتەريال دەپ تانىعان.
Mellstroy دەگەن كىم؟
Mellstroy اتىمەن تانىلعان اندرەي بۋريم – بەلارۋستەن شىققان ستريمەر، بلوگەر جانە ينفليۋەنسەر. ول ورىس ءتىلدى جەلى قولدانۋشىلارى اراسىندا «trash-ستريمينگ» جانرى ارقىلى كەڭىنەن تانىلدى. بۇل باعىتتاعى كونتەنت ادەتتە ارانداتۋشىلىققا، شوك تۋعىزاتىن ارەكەتتەرگە جانە ورىنسىز قىلىقتارعا نەگىزدەلەدى.
اندرەي بۋريم ستريمەرلىك مانسابىن 2017 جىلى Twitch پەن YouTube پلاتفورمالارىندا ويىن ترانسلياسيالارىنان باستاعان. كەيىننەن ول الكوگول، تۇنگى ساۋىق كەشتەرى، دونات-چەللەندجدەر مەن ءتۇرلى ۇتىس ويىندارىنا قۇرىلعان «لايۆ-شوۋلارعا» اۋىستى. ونىڭ اۋديتورياسى نەگىزىنەن تمد ەلدەرىنىڭ جاستارى، ال Instagram، Twitch جانە YouTube-تا ميلليونداعان جازىلۋشىسى بار.