الماتىدا 1 اقپان كۇنى «كۇي تورەسى قازانعاپ» اتتى مونوگرافيالىق ەڭبەكتىڭ تۇساۋكەسەرى وتەدى.
ءىس-شارانى كىتاپ اۆتورلارى ابدۋلحاميت جانە سايرا رايىمبەرگەنوۆتەر ۇيىمداستىرادى، دەپ حابارلايدى Almaty-akshamy.kz.
تۇساۋكەسەرگە حالىق كۇيشىسى جۇماباي جانسۇگىروۆ، تەحنيكا عىلىمدارىنىڭ كانديداتى، حالىق كۇيشىسى التىنبەك ۇمبەتوۆ، كۇيشى اسىلبەك كەنەگەسوۆ، حالىق كۇيشىسى رۇستەمبەك سەيىتوۆ، حالىقارالىق جانە رەسپۋبليكالىق سايىستاردىڭ جۇلدەگەرى جايلاۋ اسىلحانوۆ قاتىسادى.
جيناق ارحيۆتىك جانە 1962-2021 جىلدار ارالىعىنداعى فولكلورلىق ەكسپەديسيا كەزىندە تۇسىرىلگەن قۇندى فوتوسۋرەتتەرمەن (600-گە جۋىق) بەزەندىرىلگەن. سونىمەن قاتار، جيناقتا قازانعاپتىڭ ءداستۇرلى كۇيشىلىك مەكتەبىنىڭ XIX-XX عاسىر ارالىعىنداعى ءتورت ۇرپاققا سوزىلعان 74 شاكىرتىنىڭ ومىربايانىمەن قوسا، ولاردىڭ قازانعاپ مۇراسىن تاريحتا قالدىرۋعا سىڭىرگەن ەڭبەكتەرى جايلى باياندالادى.
العاش رەت كىتاپتا قازانعاپ بابامىزدىڭ شىعارمالارى (79 كۇيى) جانە ونىڭ كۇيلەرىن جەتكىزگەن تىكەلەي شاكىرتتەرىنىڭ بۇرىن-سوڭدى جارىق كورمەگەن اسا قۇندى ءۇنتاسپالارى مەن بەينەكورىنىستەرى (120-دان استام فيلمدەر) QR-كود ارقىلى بەرىلىپ وتىر.
قازاقتىڭ ونەرتانۋ عىلىمىندا حالىق كومپوزيتورلارىنا ارنالعان مۇنداي ەڭبەك ينتەراكتيۆتى كىتاپ رەتىندە ەلىمىزدە العاش جاريالانىپ وتىر. جيناق ءۇش تومنان تۇرادى. «كۇي تورەسى قازانعاپ»، «ۆلاستيتەل كيۋيەۆ كازانگاپ» (ورىسشا) جانە «قازانعاپ. كۇيلەر» (نوتالارى).
