كوللەدج بىتىرگەندەرگە قۇزىرەتتىلىك كارتاسى قوسا بەرىلەدى

بۇل تۋرالى وقۋ-اعارتۋ ءبىرىنشى ۆيسە-مينيسترى شولپان كارينوۆا ءمالىم ەتتى.

ەندى كوللەدج بىتىرگەن تۇلەكتەرگە ديپلوممەن قوسا، ولاردىڭ ماماندىعى بويىنشا جۇمىس ىستەۋ قابىلەتىن كۋالاندىراتىن قوسىمشا قۇجات بەرىلەدى.، دەپ حابارلايدى Almaty-akshamy.kz

«مەملەكەت باسشىسىنىڭ تاپسىرماسى بويىنشا كوللەدجدەرگە اكادەميالىق دەربەستىك بەرىلدى. ەڭبەك نارىعىنىڭ جىلدام دامۋىن ەسكەرسەك، اتالعان شارا ءبىلىم بەرۋ باعدارلامالارىنىڭ مازمۇنىن ۋاقتىلى جاڭارتۋعا مۇمكىندىك بەرەدى. وسىلايشا، ەلىمىزدىڭ كوللەدجدەرى جۇمىس بەرۋشىلەرمەن بىرلەسىپ، ءبىلىم بەرۋ باعدارلامالارىنىڭ مازمۇنى مەن وقۋ مەرزىمىن دەربەس ايقىنداۋعا مۇمكىندىك الدى. بۇل ەڭبەك نارىعىنىڭ تالاپتارىنا سايكەس كەلەدى»، - دەدى شولپان كارينوۆا.

ونىڭ ايتۋىنشا، جۇمىسقا ورنالاسۋدا جاس ماماننىڭ داعدىلىق جانە بىلىكتىلىك دەڭگەيى ماڭىزدى.

«بولاشاقتا كوللەدج تۇلەكتەرىنە ديپلومعا قوسىمشا قۇجات رەتىندە قۇزىرەتتىلىك كارتاسى بەرىلەدى. اتالعان قوسىمشا قۇجات جاس تۇلەكتىڭ كاسىپتىك دايارلىعى جانە ماماندىعى بويىنشا ەڭبەك فۋنكسيالارىن ورىنداۋ دەڭگەيىن مەڭگەرۋىن كورسەتەدى»، - دەيدى ول.