2024 جىلدىڭ 4 جەلتوقسانىندا «AMANAT» پارتياسىنىڭ الماتى قالالىق فيليالى بيۋروسىنىڭ وتىرىسىندا كريستينا بەكمۋرزايەۆانى الماتى ءماسليحاتىنىڭ دەپۋتاتى ەتىپ تاعايىنداۋ تۋرالى شەشىم قابىلداندى، دەپ حابارلايدى aqshamnews.kz
بوس ماندات اسيا اقانوۆانىڭ الماتى قالالىق قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى قىزمەتىنە تاعايىندالۋىنا بايلانىستى پايدا بولدى.
قازىرگى ۋاقىتتا كريستينا بەكمۋرزايەۆا الماتى جاستارىن، مادەنيەتى مەن سپورتىن قولداۋ جوبالىق كەڭسەسىنىڭ جەتەكشىسى، «Almaty Creative» ج ش س باقىلاۋ كەڭەسىنىڭ مۇشەسى جانە «Almaty Creative Bureau» شىعارماشىلىق بىرلەستىگىنىڭ كوشباسشىسى بولىپ تابىلادى.
ءوز مانسابىندا ول جۇزدەن استام ءىرى جوبالاردى ىسكە اسىرۋعا قاتىسقان. ولاردىڭ قاتارىندا الماتىدا قوعامدىق قاۋىمداستىق ورتالىقتارىن قۇرۋ، «شاپاعات» جانە «الەۋمەتتىك قىزمەتتەر ءۇيى» الەۋمەتتىك ورتالىقتارىن ىسكە قوسۋ، سونداي-اق كوشە ونەرى جوبالارى، سونىڭ ىشىندە Almaty Gallery اشىلۋى بار. سونىمەن قاتار، ول 15-تەن استام كىتاپحانا مەن مادەنيەت ۇيلەرىن قالپىنا كەلتىرۋ جانە جاڭعىرتۋ جۇمىستارىمەن اينالىسقان. ونىڭ پورتفەلىندە استانا، پاۆلودار، شىمكەنت جانە اقتوبە سەكىلدى ءىرى قالالارداعى قوعامدىق كەڭىستىكتەردى مودەرنيزاسيالاۋ جوبالارى دا بار.
- كريستينا بەكمۋرزايەۆا و. تانسىقبايەۆ اتىنداعى الماتى كوركەمسۋرەت ۋچيليششەسىندە، ت. جۇرگەنوۆ اتىنداعى قازاق ۇلتتىق ونەر اكادەمياسىندا، سونداي-اق گەرمانيانىڭ FH Aachen ۋنيۆەرسيتەتىندە ءبىلىم العان.
- الەۋمەتتىك جانە مادەني ورتانى دامىتۋداعى ۇلەسى ءۇشىن «ەرەن ەڭبەگى ءۇشىن» مەملەكەتتىك مەدالىمەن ماراپاتتالعان.