ۇكىمەتتىڭ باسپا ءسوز قىزمەتى اباي وبلىسىندا قازا بولعان 14 ورمانشىنىڭ وتباسىلارىنا قانداي قولداۋ شارالارى كورسەتىلەتىنىن ءمالىم ەتتى، دەپ حابارلايدى قازاقپارات.
مەملەكەت باسشىسىنىڭ تاپسىرماسىن ورىنداۋ ماقساتىندا قازا بولعانداردىڭ وتباسىلارىنا كەلەسى قولداۋ شارالارى كورسەتىلەدى:
1) وتباسىنىڭ ەڭبەككە جارامسىز بارلىق مۇشەسىنە (كامەلەتكە تولماعان بالالارعا) رەسپۋبليكالىق بيۋدجەتتەن اسىراۋشىسىنان ايىرىلۋ بويىنشا جاردەماقى؛
2) وتباسىنىڭ ەڭبەككە جارامسىز بارلىق مۇشەسىنە مەملەكەتتىك الەۋمەتتىك ساقتاندىرۋ قورىنان اسىراۋشىسىنان ايىرىلۋ بويىنشا ءبىرجولعى الەۋمەتتىك تولەماقى؛
3) قاجەتتى جيھازبەن جابدىقتالعان تۇرعىن ۇيمەن قامتاماسىز ەتۋ؛
4) بجزق-دان جەرلەۋگە ارنالعان ءبىرجولعى تولەم.
سونداي-اق نەسيەلەردى ەسەپتەن شىعارۋ ءۇشىن قايتىس بولعان ادامدار مەن ولاردىڭ وتباسىلارىنىڭ نەسيەلىك جۇكتەمەسى انىقتالادى.
بۇعان دەيىن حابارلاعانىمىزداي، كەشە ۇكىمەت باسشىسى ءاليحان سمايىلوۆتىڭ توراعالىعىمەن اباي وبلىسىنداعى ءىرى تابيعي ءورتتى جويۋ جانە ودان زارداپ شەككەن وتباسىلارعا قاجەتتى قولداۋ شارالارىن كورسەتۋ ماسەلەلەرى جونىندە جەدەل كەڭەس ءوتتى. ءمالىم بولعانداي، قازا تاپقانداردىڭ وتباسىلارىنا «قازاقستان حالقىنا» قورىنان 7 ملن تەڭگەدەن، سونداي-اق كامەلەتكە تولماعان ءار بالاعا 2 ملن تەڭگەدەن تولەنەتىن بولادى.
بۇدان بولەك، قازا تاپقانداردىڭ وتباسىلارىنا جانە زارداپ شەككەندەرگە قاجەتتى قولداۋ شارالارىن كورسەتۋ ماقساتىندا ارنايى قور قۇرىلدى.
سونىمەن قاتار 40-تان استام قازاقستاندىق جوو ورتتەن زارداپ شەككەن وتباسىلاردىڭ ستۋدەنتتەرىنە گرانتتار مەن جاتاقحانادان ورىن بەرۋگە دايىن. ال اقىلى نەگىزدە وقيتىن ستۋدەنتتەر مەن ماگيسترانتتاردى گرانتقا اۋىستىرۋ كوزدەلگەن.