شەتەلدىك پسيحياتر ياگو فەرناندەستىڭ ايتۋىنشا، كوز جاسىن تىيۋ مەن ەموسيالاردى جاسىرۋ دەنساۋلىققا ەداۋىر زيان تيگىزۋى مۇمكىن.
ول Metropoles باسىلىمىنا بەرگەن سۇحباتىندا بۇل ادەت يممۋنيتەتتى تومەندەتىپ، ادامدى ءتۇرلى پسيحولوگيالىق جانە فيزيكالىق سىرقاتتارعا بەيىم ەتەتىنىن ايتتى، - دەپ حابارلايدى aqshamnews.kz.
فەرناندەستىڭ سوزىنشە، ەموسيالاردى تەجەۋ ولاردىڭ جوعالۋىنا اكەلمەيدى. كەرىسىنشە، ىشتە ساقتالعان سەزىمدەر اعزانىڭ سترەستىك جۇيەسىن بەلسەندىرىپ، ونى ۇنەمى جوعارى «دايىندىق» كۇيىندە ۇستايدى. بۇل ءوز كەزەگىندە مازاسىزدىق، كۇيزەلىس، ۇيقىسىزدىق سياقتى پسيحولوگيالىق قيىندىقتارعا الىپ كەلۋى مۇمكىن.
سونىمەن قاتار، ەموسيانى سىرتقا شىعارماۋ سالدارىنان اعزادا ءتۇرلى فيزيكالىق رەاكسيالار پايدا بولادى:
- سوزىلمالى اۋىرسىنۋلار،
- السىزدىك پەن تەز شارشاۋ،
- يممۋنيتەتتىڭ تومەندەۋى.
ماماننىڭ ايتۋىنشا، جىلاعاننان كەيىن اعزادا پاراسيمپاتيكالىق جۇيكە جۇيەسى ىسكە قوسىلادى. ول قان قىسىمىن تومەندەتىپ، جۇرەك سوعىسىن باياۋلاتادى، سونداي-اق، سترەسس سالدارىن بەيتاراپتاندىرادى.
«ەموسيالاردى تەجەۋدىڭ ورنىنا ولارعا ەرىك بەرۋ الدەقايدا پايدالى. بۇل – پسيحيكالىق تا، فيزيكالىق تا ساۋلىقتى ساقتاۋ ءۇشىن ماڭىزدى»، – دەيدى فەرناندەس.
ەموسيانى ساۋاتتى شىعارۋدىڭ قاراپايىم تاسىلدەرى:
- پسيحولوگتار ەموسيانى ىشتە ۇستاماي، ونى ءقاۋىپسىز جولمەن شىعارۋدى ۇسىنادى.
- جىلاۋعا مۇمكىندىك بەرىڭىز. بۇل – تابيعي رەاكسيا، ول اعزانى جەڭىلدەتەدى.
- اڭگىمەلەسىڭىز. جاقىندارىڭىزبەن وي ءبولىسۋ ەموسيانى جەڭىلدەتۋگە كومەكتەسەدى.
- جازىپ كورىڭىز. كۇندەلىك جۇرگىزۋ ىشكى سەزىمدەردى قاعازعا تۇسىرۋگە جاقسى ءادىس.
- قوزعالىس جاساڭىز. جاياۋ ءجۇرۋ، سپورت نەمەسە تىنىس جاتتىعۋلارى سترەستى ازايتادى.
- شىعارماشىلىققا بەت بۇرىڭىز. سۋرەت سالۋ، مۋزىكا تىڭداۋ نەمەسە باسقا حوببيلەر ەموسيانى سىرتقا شىعارۋدىڭ ءتيىمدى جولى.