كوشپەندىلەر ويىندارىنىڭ لوگوتيپى تانىستىرىلدى

ويىن تاريحى

دۇنيەجۇزىلىك كوشپەندىلەر ويىندارى – ەتنيكالىق، ءداستۇرلى سپورت تۇرلەرى بويىنشا حالىقارالىق جارىس. 2014، 2016 جانە 2018 جىلدارى العاشقى ويىندار قىرعىزستاننىڭ شولپان اتا قالاسىندا وتكەن ەدى.

2022 جىلى تۇركيانىڭ يزنيك شاھارىندا ءتورتىنشى دۇنيەجۇزىلىك ويىندار ۇيىمداستىرىلدى.

«پرەزيدەنت قاسىم-جومارت كەمەل ۇلىنىڭ باستاماسىمەن ەلىمىز كەلەسى جىلى دۇنيەجۇزىلىك كوشپەندىلەر ويىندارىن وتكىزەدى. بۇل – الەم جۇرتشىلىعىنا كوشپەندىلەردىڭ دانالىعى مەن ءداستۇرىن، مادەنيەتى مەن ونەرىن پاش ەتەتىن حالىقارالىق دەڭگەيدەگى ايتۋلى مەرەكە. ءقازىردىڭ وزىندە ەلىمىزدە وتەتىن كوشپەندىلەر ويىندارىنا 73 مەملەكەتتىڭ وكىلدەرى قاتىسۋعا نيەت ءبىلدىردى. دەمەك، الەم ەلدەرىنىڭ قىزىعۋشىلىعى ءالى دە ارتىپ، قاتىسۋشىلار سانى ەداۋىر كوبەيۋى مۇمكىن. جارىستى جوعارى دەڭگەيدە وتكىزۋ ءۇشىن ۇيىمداستىرۋ كوميتەتى بار كۇشىن سالادى»، - دەدى ق ر تۋريزم جانە سپورت ءمينيسترى ەرمەك مارجىقپايەۆ ورتالىق كوممۋنيكاسيالار قىزمەتىندە.

دۇنيەجۇزىلىك كوشپەندىلەر ويىندارى تۇركى، تاريحي كوشپەندى حالىقتاردىڭ مادەني جانە رۋحاني جاقىنداسۋىنا سەپتەسىپ، ارالاس-قۇرالاستىعىن ارتتىرادى.

ونىڭ سپورت باعدارلامالارى – تۇركى جۇرتىنىڭ ورتاق تاريحى مەن مادەنيەتىن بىرىكتىرەتىن كوشپەلى حالىقتاردىڭ ۇلتتىق ويىندارىنا نەگىزدەلگەن.

بەسىنشى كوشپەندىلەر ويىنىندا سپورتتىڭ 20 تۇرىنەن جارىس جانە 10 كورنەكى سپورت سايىسىن وتكىزۋ جوسپارلانعان.

ولاردىڭ قاتارىندا ات جارىسى، ۇلتتىق كۇرەس تۇرلەرى، ءداستۇرلى ينتەللەكتۋالدىق ويىندار، جەكپە-جەك تۇرلەرى بويىنشا، ءداستۇرلى ساداق اتۋ، ساياتشىلىق ونەرى، حالىق ويىندارى، سونداي-اق ەتنيكالىق سپورت تۇرلەرىنەن كورسەتىلىم قويىلىمدارى بار.

جاڭا عيماراتتار سالىنبايدى

ويىن ۇيىمداستىرۋشىلارى حالىقارالىق جارىستى وتكىزۋدە ارتىق شىعىنعا جول بەرمەۋ مەن تيىمدىلىك ۇستانىمدارىنا سۇيەنەدى. ويىنداردى وتكىزۋ ءۇشىن جاڭا عيماراتتار سالىنباي، قولدا بار سپورت قۇرىلىمدارى تارتىلادى.

ماسەلەن، 8 قىركۇيەكتە «استانا ارەنا» ستاديونىندا ويىننىڭ اشىلۋ سالتاناتى وتەدى.

ال ج.ۇشكەمپىروۆ اتىنداعى جەكپە-جەك سارايى مەن «الاۋ» مۇز سارايىندا ۇلتتىق كۇرەس تۇرلەرىنەن جارىستار، ەتنواۋىل اۋماعىندا – ات جارىسى، ءداستۇرلى ساداق اتۋ جانە ساياتشىلىق ونەر جارىستارى، «دۋمان» كەشەنىندە – ءداستۇرلى ينتەللەكتۋالدى ويىندار وتەدى.

«Qazaqstan» جەڭىل اتلەتيكالىق سپورت كەشەنىندە – دۇنيەجۇزىلىك كوشپەندىلەر ويىندارىنىڭ اككرەديتتەۋ جانە جابدىقتاۋ ورتالىقتارى ورنالاسادى. ويىننىڭ جابىلۋ سالتاناتى 14 قىركۇيەكتە «قازانات» يپپودرومىندا وتپەك.

قازىرگى ۋاقىتتا «قازانات» يپپودرومىندا رەكونسترۋكسيا، «استانا ارەنا» ستاديونى مەن «الاۋ» مۇز سارايىندا جوندەۋ جۇمىستارى باستالىپ كەتتى. قايتا جاڭارتۋ جۇمىستارىنان كەيىن «قازانات» يپپودرومى – ءبىر ۋاقىتتا 10 مىڭ كورەرمەندى قابىلداي الادى.

استاناعا 100 مىڭنان استام تۋريست كەلەدى

دۇنيەجۇزىلىك كوشپەندىلەر ويىندارى قارساڭىندا ەلىمىزدىڭ بارلىق ايماعىن قامتىعان «بىرلىك كەرۋەنى» جوباسى باستالادى.

قازىرگى كۇنى ءىرى سپورتتىق جارىستاردىڭ بارلىعىندا دەرلىك (وليمپيادا، ازيا ويىندارى، ۋنيۆەرسيادا جانە ت.ب.) ءتۇرلى فورمادا الاۋ ەستافەتاسى ۇيىمداستىرىلادى.

كەي جاعدايلاردا الاۋعا بالاما رەتىندە باسقا دا قاسيەتتى ەلەمەنتتەر نەمەسە ەجەلگى جادىگەرلەردى قولدانىلۋى مۇمكىن. ماسەلەن، بۇعان دەيىن وتكەن دۇنيەجۇزىلىك كوشپەندىلەر ويىندارىندا قاسيەتتى بۇلاق سۋى ەستافەتا مەن اشىلۋ سالتاناتىنىڭ نەگىزگى ەلەمەنتى بولعان ەدى.

وسى ءداستۇر استانادا دا جالعاسىن تابادى. «بىرلىك كەرۋەنى» ەلىمىزدىڭ بارلىق ايماعىن قامتىپ، ەلوردادا مارەگە جەتەدى. 

سونىمەن بىرگە، «قازانات» يپپودرومى ماڭىندا 10 گەكتارعا سوزىلعان «كوشپەندىلەر الەمى» ەتنواۋىلى اشىلادى. وندا ءاربىر كەلۋشى قازاق حالقىنىڭ جانە وزگە دە قاتىسۋشى ەلدەردىڭ ءتول مادەنيەتىمەن، سالت-داستۇرىمەن تەرەڭ تانىسا الادى.

ءار ءوڭىر ءوز كيىز ءۇيىن تىگىپ، ايماقتىڭ مادەني جانە تۋريستىك ەرەكشەلىكتەرىن كەڭىنەن تانىستىرادى.

اشىق اسپان استىندا كوشپەلىلەر وركەنيەتىنىڭ مۇراجايى، قولونەرشىلەر قالاسى ورنالاسادى، «Neo nomads Fest» اتتى ۋربانيستيكا فەستيۆالى، ۇلتتىق تاعامدار فەستيۆالى، سپورتتىق سايىستار، ايتىس جانە باسقا كەشتەر ۇيىمداستىرىلادى.

بولجامعا سايكەس، ەتنواۋىل كەشەنى كۇنىنە 30 مىڭ كەلۋشىنى قابىلداي الادى.

شەتەلدىك تۋريستەر مەن جارىس قاتىسۋشىلارى ءۇشىن سپورت نىساندارىنىڭ جانىندا ورنالاسقان ەلوردانىڭ ۇزدىك 23 قوناق ءۇيى قىزمەت ۇسىنادى.

جالپى سپورت جارىستارى مەن مادەني شارالاردى تاماشالاۋعا قازاقستاندىق جانە شەتەلدىك 100 مىڭنان استام تۋريست كەلەدى دەپ جوسپارلانعان.

كۇنباستى سالت اتتى – ويىننىڭ باستى ءرامىزى

V دۇنيەجۇزىلىك كوشپەندىلەر ويىندارى «ۇلى دالا ءدۇبىرى» ۇرانىمەن وتەدى. ونداعى لوگوتيپتە كۇنباستى سالت اتتى بەينەلەنگەن.

بۇل بەلگى دۇنيەجۇزىلىك كوشپەندىلەر ويىندارىن وتكىزۋشى ەلدەردىڭ بارلىعىندا قولدانىلىپ كەلەدى.

لوگوتيپتىڭ جالپى ءپىشىن سۇلباسى كوشپەندىلەر قولدان جاساعان تۇرمىستىق بۇيىمىنىڭ ساندىك ەلەمەنتتەرىنە ۇقسايدى. لوگوتيپ قويۋ قىزىل تۇسپەن بويالعان.

بۇل اقىق تاستىڭ ءتۇسى قان مەن وتتى، جۇرەك پەن كۇندى ەسكە سالادى ءارى ادام بويىنا قۋات بەرەدى دەگەن سەنىممەن ۇشتالادى.

اقىق تاسپەن ەجەلدە قامشى، بەلبەۋ ىسپەتتى بۇيىمدار ارلەنگەن. ويىن اتاۋى مىڭجىلدىقتىڭ باسىندا تۇركى رۋنالارىندا قولدانىلعان ءتۇپنۇسقا شريفتپەن جازىلعان.