60 كەلى سالماقتا سىنعا تۇسكەن قازاقستان ۇلتتىق قۇراماسىنىڭ سپورتشىسى ەرمەك قۇرالباي التىن مەدالعا يە بولدى.
بۇل تۋرالى «ۇلتتىق جانە ات سپورت تۇرلەرى ورتالىعىنىڭ» باسپا ءسوز قىزمەتى مالىمدەدى، دەپ حابارلايدى aqshamnews.kz.
ەرمەك قۇرالباي فينالدا قىرعىزستان سپورتشىسىن جەڭدى.
«جاقسى دايىندىقپەن كەلدىم. فينالداعى قارسىلاسىم – بىلتىر ات ۇستىندەگى كۇرەستەن 60 كەلىدە چەمپيون بولعان قىرعىز پالۋانى. ەل نامىسىن قورعاپ، ءبىرىنشى ورىن الامىز دەپ ۇمىتتەنگەن ەدىم. سەنىمدى اقتاعانىما قۋانىشتىمىن»، – دەدى اۋدارىسپاقتان ۇلتتىق قۇراما سپورتشىسى ەرمەك قۇرالباي.
«قازانات» يپپودرومى ماڭىنداعى ەتنواۋىلدا ءوتىپ جاتقان اۋدارىسپاقتان باسەكەگە 9 مەملەكەتتەن، 64 سپورتشى تىركەلدى. ولار: قازاقستان، قىرعىزستان، وزبەكستان، موڭعوليا، تۇركيا، ۆەنگريا، جۇڭگو، اقش جانە رەسەي. 10 قىركۇيەكتە ەسىمحان ءراحماتىللا، سىرىم ءىزباساروۆ جانە ءبىرجان قوسالييەۆ سىنعا تۇسەدى.