دۇنيەجۇزىلىك كوشپەندىلەر ويىندارىنىڭ مادەني باعدارلاماسى اياسىندا 100-دەن استام ءىس-شارا وتەدى، دەپ حابارلايدى aqshamnews.kz.
وسى ماقساتتا ەلوردادا 10 گەكتار اۋماقتى قامتيتىن ەتنواۋىل اشىلعان. مۇنداعى ءار كۇن قازاق حالقىنىڭ باي مادەني مۇراسى مەن داستۇرلەرىن كورسەتەتىن «شاتتىق كەرۋەنى» اتتى شەرۋمەن باستالادى. «ونەر ورداسى» باستى ساحناسىندا كۇن سايىن ەلدىڭ تۇكپىر-تۇكپىرىنەن كەلگەن ۇزدىك ايماقتىق ۇجىمداردىڭ كونسەرتى وتەدى. مۇندا ەتنوفولكلورلىق انسامبلدەر، قازاق ۇلتتىق وركەسترلەرى، سوليستەر جانە بي ۇجىمدارى ءداستۇرلى ەتنيكالىق ستيلدە ونەر كورسەتەدى. ال ەتنوشاتىر الاڭىندا قولونەر شەبەرلەرىنىڭ جۇمىستارىن كورە الاسىز. سونداي-اق، ايتىس مۋزىكالىق-پوەتيكالىق سايىسىن تاماشالاۋعا مۇمكىندىك بار.
مەيىربەك سالاماتوۆ، ايتىسكەر-اقىن: - ءبىزدىڭ قازاقستاننىڭ ءار ءوڭىرىنىڭ ءوزىنىڭ مادەنيەتى، تاريحى، ونەرى بار. سولاردى ناسيحاتتاپ، پاش ەتۋ ماقساتىندا وسى ۇلكەن مادەني شارالار ۇيىمداستىرىلىپ جاتىر. ماڭعىستاۋ وبلىسىنان وسى استانا قالاسىندا ءوتىپ جاتقان كوشپەندىلەر ويىنىنا ايتىسكەر اقىن رەتىندە كەلدىم. بۇيىرتسا وسى كوشپەندىلەر ويىنىنا اتسالىسىپ، اباي وبلىسىنىڭ اقىنىمەن ايتىساتىن بولامىن.