2024 جىلدىڭ 5 قىركۇيەگى مەن 1 قازان ارالىعىندا «تۇيىق-سۋ» الپينيستىك لاگەرىندە رەسپۋبليكالىق جەدەل-قۇتقارۋ وتريادىنىڭ قۇتقارۋشىلارىنا «باستاپقى دايىندىق» باعدارلاماسى بويىنشا وقىتۋ جۇمىستارى وتەدى. وقىتۋ الماتى قالاسىنىڭ الپينيزم فەدەراسياسىنىڭ تاجىريبەلى نۇسقاۋشىلارىنىڭ جەتەكشىلىگىمەن جۇرگىزىلىپ جاتىر. جوبانى ۇيىمداستىرۋشى – الماتى قالاسىنىڭ تۋريزم باسقارماسى.
وقۋ باعدارلاماسى قۇتقارۋ وپەراسيالارىنىڭ نەگىزگى پرينسيپتەرى مەن ادىستەرىن مەڭگەرۋگە، سونداي-اق توتەنشە جاعدايلاردا ۇيىمداستىرۋ جانە باسقارۋ داعدىلارىن دامىتۋعا باعىتتالعان تەوريالىق جانە پراكتيكالىق ساباقتاردان تۇرادى.
تەوريالىق دايىندىق بارىسىندا قۇتقارۋشىلار قۇتقارۋ وپەراسيالارىن جوسپارلاۋدىڭ نەگىزگى اسپەكتىلەرىن، تاۋەكەلدەردى باعالاۋدى، ارنايى الپينيستىك قۇرال-جابدىقتاردى قولدانۋدى جانە تاۋلى جاعدايدا العاشقى مەديسينالىق كومەك كورسەتۋ تەحنيكاسىن ۇيرەنبەك. قۇتقارۋ توپتارى اراسىنداعى ءوزارا بايلانىسقا جانە ءىس-قيمىلداردى ۇيلەسىمدى جوسپارلاۋ ماسەلەلەرىنە ايرىقشا نازار اۋدارىلادى.
پراكتيكالىق دايىندىق ناقتى تاۋلى رەلەف جاعدايىندا 1-2 كۇردەلىلىك دەڭگەيىندەگى ىلە الاتاۋىنىڭ كلاسسيفيكاسيالانعان الپينيستىك مارشرۋتتارىندا 3-رازرياد ءنورماتيۆىن ورىنداۋ ارقىلى وتەدى. بۇل قۇتقارۋشىلارعا قول جەتىمسىز جانە ەكسترەمالدى جاعدايلاردا جۇمىس ىستەۋ ءۇشىن قاجەتتى داعدىلاردى الۋعا مۇمكىندىك بەرەدى.
جاتتىعۋلار بەتكەيلەرگە كوتەرىلۋ جانە ءتۇسۋ، زارداپ شەككەندەردى ەۆاكۋاسيالاۋ، ارقان جانە باسقا دا ارنايى الپينيستىك قۇرال-جابدىقتاردى قولدانۋ ارقىلى قۇتقارۋ وپەراسيالارىن جۇرگىزۋگە باعىتتالعان.
«باستاپقى دايىندىق» باعدارلاماسى بويىنشا قۇتقارۋشىلاردى دايىنداۋ - الماتى تاۋلى ايماقتارىندا تۋريستەردىڭ قاۋىپسىزدىگىن ارتتىرۋعا مۇمكىندىك بەرەدى. وقىتۋ ناتيجەسىندە قۇتقارۋشىلار كەز كەلگەن توتەنشە جاعدايلارعا جەدەل جاۋاپ بەرىپ، مەگاپوليس قوناقتارى مەن تۇرعىندارىنىڭ قاۋىپسىزدىگىن قامتاماسىز ەتە الادى.