الماتىدا تازىلار قاتىساتىن حالىقارالىق كورمە وتەدى
2024 جىلعى 28-29 قىركۇيەكتە الماتىدا «اۆرورا كۋبوگى» جانە «كوشپەندىلەر دالاسى» اتتى بارلىق يت تۇقىمدارى قاتىساتىن ەكى كورمە وتەدى. ءىس-شارانى «اۆرورا» كينولوگيالىق كلۋبى ۇيىمداستىرىپ وتىر، دەپ حابارلايدى aqshamnews.kz.
حالىقارالىق كورمەگە قازاقستان، وزبەكستان، قىرعىزستان جانە رەسەيدەن بارلىعى 500-دەن استام يت قاتىسادى. ەلۋدەن استام يت تۇقىمى قازاقستان چەمپيونى جانە حالىقارالىق اسەمدىك چەمپيونى اتاقتارىن ساراپقا سالادى. وعان نيدەرلاند، سلوۆاكيا، گرەكيا جانە قىتايدان كەلگەن حالىقارالىق ساراپشىلار تورەلىك ەتەدى.
حالىقارالىق كينولوگيالىق فەدەراسيا (FCI) كورمەلەرىنىڭ تاريحىندا تۇڭعىش رەت «قازاق تازىسى» تۇقىمى 10-شى اسىل تۇقىمدى تازىلار توبىندا رەسمي تۇردە جۇرتشىلىق نازارىنا ۇسىنىلادى.
ەستەرىڭىزگە سالا كەتەيىك، بيىل 3 قىركۇيەكتە حالىقارالىق كينولوگيالىق فەدەراسيا (FCI) قازاق تازىسىن رەسمي تۇردە ادەپكى تانۋ تۋرالى شەشىم شىعارىپ، قازاقستانعا وسى تۇقىم ستاندارتىنىڭ يەسى مارتەبەسىن بەردى. بۇل جەتىستىككە ق ر پرەزيدەنتى ءىس باسقارماسىنىڭ قامقورلىعىمەن قازاقستان كينولوگتارى وداعىنىڭ قاجىرلى ەڭبەگىنىڭ جانە كۇش-جىگەرىنىڭ، سونداي-اق بىرەگەي تۇقىمدى ساقتاۋعا، دامىتۋعا جانە تانىمال ەتۋگە وراسان زور ۇلەس قوسقان كوپتەگەن كينولوگتاردىڭ، سەلەكسيونەرلەردىڭ، يتبەگىلەر مەن اۋەسقوي ازاماتتاردىڭ ارقاسىندا قول جەتكىزىلدى. ءسويتىپ، وسى كۇننەن باستاپ قازاق تازىسى FCI رەسمي مويىنداعان باسقا يت تۇقىمدارىمەن تەڭ دارەجەدە الەمنىڭ كەز كەلگەن ەلىندە چەمپيون اتاعى ءۇشىن جارىسقا قاتىسۋ، رينگكە شىعۋ قۇقىن يەلەندى.
«كوشپەندىلەر دالاسى» حالىقارالىق يتتەر كورمەسىندە قازاق تازىسى رينگىندەگى ەكسپونەنتتەرگە حالىقارالىق كينولوگيالىق فەدەراسيانىڭ ۆيسە-پرەزيدەنتى جەرارد ييپپينگ (Jerard Jipping) باعا بەرەتىن بولادى.
سونىمەن قاتار، «كوشپەندىلەر دالاسى» حالىقارالىق كورمەسى اياسىندا قازاق تازىسى تۇقىمىنىڭ كورمەسى وتەدى، وندا ەكسپونەنتتەر اسىل تۇقىمدى يتتەردىڭ رەسمي ستاندارتىنا سايكەس باعالانادى جانە چەمپيوندىق اتاقتى ءوزارا ساراپقا سالادى.
يتتەر كورمەسى قارساڭىندا «اۆرورا» كينولوگيالىق كلۋبى Marwin شىعارماشىلىق الەمىنىڭ قولداۋىمەن 6-15 جاس ارالىعىنداعى بالالار قاتىسقان «كوشپەندى جانە يت» سۋرەتشىلەر بايقاۋىن وتكىزدى. قاتىسۋشىلاردىڭ بارلىق تۋىندىلارى 28 جانە 29 قىركۇيەكتەگى كورمەدە جۇرتشىلىق نازارىنا ۇسىنىلادى. كورمەلەردىڭ العاشقى كۇنى، ياعني 28 قىركۇيەكتە كەلۋشىلەر وزدەرىنە ۇناعان سۋرەتكە داۋىس بەرىپ، كورەرمەندەر كوزايىمى سىيلىعىنا لايىق تۋىندىنى انىقتايدى. جەڭىمپازدار 29 قىركۇيەكتە يتتەر كورمەسىنىڭ اشىلۋى قارساڭىندا ماراپاتالادى. ال بايقاۋدا جەڭىسكە جەتكەن تۋىندى بۇكىل كورمەنىڭ جەڭىمپازىنا ەستەلىك سىيلىق رەتىندە تاپسىرىلادى.
بارلىق يتتەر تۇقىمىنىڭ ۇلتتىق كورمەسى – 28.09.2024 ج. باستالۋى 09:00-دە.
«قازاق تازىسى» مونوتۇقىمدى كورمەسى – 29.09.2024 ج. باستالۋى 09:00-دە.
بارلىق يتتەر تۇقىمىنىڭ حالىقارالىق كورمەسى – 29.09.2024 ج. باستالۋى 09:00.
وتەتىن ورنى: «تۇلپار» ات سپورتى كەشەنى (الماتى ق. جانسۇگىروۆ كوشەسى، 262/2).