جۋىردا قارا قىرعىز اۆتونوميالىق وبلىسىنىڭ 100 جىلدىعىنا وراي «رۋح بەينە» حالىقارالىق شىعارماشىلىق اكادەمياسى مەن «اقتال» ادەبي شىعارماشىلىق بىرلەستىگى ۇيىمداستىرعان حالىقارالىق شەڭبەردەگى «رۋح-فەست قىرعىزستان – 100» فەستيۆالىنىڭ قورىتىندى سالتاناتى بىشكەك قالاسىنداعى الىكۋل وسمونوۆ اتىنداعى قىرعىز ۇلتتىق كىتاپحاناسىندا ءوتتى.
ايىر قالپاقتى كورشى ەلدىڭ قالامگەرلەرى جاريالاعان ءمۇشايراعا ولەڭ-تولعاۋىن جولداعان قازاقستاندىق الەم حالىقتارى جازۋشىلارى وداعىنىڭ ءبىر توپ مۇشەلەرى فەستيۆالدىڭ مارتەبەلى قوناعى بولىپ قاتىسىپ قايتتى. ءبىر ەلدىڭ ىرگە بەكىتۋىنە عاسىر تولعان وسىناۋ القالى جيىنعا رەسەيدىڭ «التىن قالام» ءادەبي قوعامداستىعىنىڭ نەگىزىن قالاۋشى ءارى پرەزيدەنتى، جازۋشى-جۋرناليست سۆەتلانا ساۆيسكايا، «ادامزاتتىڭ ايتماتوۆى» اتانعان اتاقتى جازۋشى شىڭعىس ايتماتوۆتىڭ قارىنداسى، عالىم-ۇستاز روزا تورەقۇل قىزى ايتماتوۆا قاتىسىپ، تىلەكتەستىگىن ءبىلدىردى.
«تاريحسىز حالىق، تامىرسىز جەر بولمايدى» دەگەندەي، ءبىزدىڭ قىرعىز حالقىنىڭ سان عاسىرلىق تاريحى بار. «تاريحىڭدى جوققا شىعارساڭ، تامىرسىز بولاسىڭ» دەپ اتالارىمىز ايتقانداي، تاريحىمىزدى ەشقاشان ۇمىتپاۋىمىز كەرەك. سوندىقتان قىرعىز حالقى اتا-بابالارىمىز بەن بۇگىنگى بەرەكەلى ءومىرىمىزدىڭ نەگىزىن قالاعان، حالقىمىزدىڭ اتىن، كونە ءتىلىمىزدى عاسىرلار بويى ساقتاپ، تاۋەلسىز قىرعىز رەسپۋبليكاسىنىڭ قۇرىلىپ، نىعايۋىنا داڭعىل جول سالعان تۇلعالاردىڭ جارقىن ەستەلىكتەرىن ساقتاۋى كەرەك، -- «رۋح بەينە» حالىقارالىق شىعارماشىلىق اكادەمياسىنىڭ پرەزيدەنتى قايىرگۇل جولدوشبەك قىزى.
بايقاۋعا الپىس ەكى شىعارما كەلىپ ءتۇستى. بايقاۋعا قازاق، ورىس، تۇرىك، وزبەك ەلدەرى قالامگەرلەرىنىڭ تۋىندىلارى قاتىستىرىلدى. كوميسسيانى بەلگىلى پروفەسسور، پەداگوگيكا عىلىمدارىنىڭ دوكتورى، «توگولوك مولدو» اتىنداعى ادەبي سىيلىقتىڭ يەسى سۋلايمان رىسبايەۆ باسقاردى. جەڭىمپاز بەن جۇلدەگەرلەردى انىقتاۋ جاسىرىن جولمەن جۇرگىزىلدى. جۇلدەلى 1-ورىن تارازدىق ج.تولاش قىزىنا بۇيىردى. 2-ورىن تۇركىستاندىق ع.بەكتءورەيەۆ الدى. 3-ورىندى اقتوبەلىك ساعىنعالي نۇرىشيەۆ يەلەنءدى. ىنتالاندىرۋ سىيلىقتارى اقىن ماقسۇتحان باركول-دالەي ۇلى مەن گۇلجانات شونابايعا بەرىلدى. جەڭىمپازدار مەن جۇلدەگەرلەر قۇرمەت گراموتاسى مەن اقشالاي سىيلىقپەن ماراپاتتالدى.
قىرعىزستانعا ساپار شەككەن قازاق دەلەگاسياسىنىڭ قۇرامىندا الماتىداعى چايكوۆسكيي اتىنداعى مۋزىكالىق كوللەدجدىڭ ستۋدەنتى ءمادي مىرزاحان مولدابايدىڭ ءانىن اۋەلەتىپ، زور داۋسىمەن قىرعىز اعايىنداردى ءتانتى ەتتى. ءمادي ءبىر عاسىر بۇرىن قارا دومبىراسىمەن پاريجدە ءان سالعان امىرە اتاسىنىڭ جولىن قايتا جاڭعىرتقانداي.