الماتىدا كوشى-قون زاڭناماسىن بۇزعان شەتەلدىكتەر جاۋاپقا تارتىلدى، - دەپ حابارلايدى aqshamnews.kz Polisia.kz-كە سىلتەمە جاساپ.
الماتىدا كوشى-قون زاڭناماسىن بۇزۋشىلىقتاردى انىقتاۋ جانە كوشى-قون جاعدايىن تۇراقتاندىرۋعا باعىتتالعان "زاڭسىز كەلۋشى - 2025" رەسپۋبليكالىق جەدەل-پروفيلاكتيكالىق ءىس-شاراسى جالعاسۋدا. شارانىڭ ءۇش كۇنىندە قازاقستاندا بولۋ جانە جۇمىسقا ورنالاسۋ ەرەجەلەرىن بۇزعان 548 ادام اكىمشىلىك جاۋاپكەرشىلىككە تارتىلدى. ونىڭ ىشىندە 527 شەتەل ازاماتى قازاقستان رەسپۋبليكاسىنان شىعارىلدى. ەلىمىزدە بولۋ ەرەجەسىن بۇزعان 362 شەتەلدىك، شەتەلدىكتەردىڭ قازاقستان رەسپۋبليكاسىندا بولۋ ءتارتىبىن بۇزعان 164 قابىلداۋشى تاراپ، شەتەلدىك جۇمىس كۇشىن زاڭسىز تارتقان 22 جۇمىس بەرۋشى جاۋاپقا تارتىلدى. تمد ەلدەرىنەن كەلگەن 282 شەتەل ازاماتىنىڭ الماتىدا ۋاقىتشا بولۋ مەرزىمى قىسقارتىلدى. كوشى-قون زاڭناماسىن ورەسكەل بۇزعانى ءۇشىن سوت شەشىمىمەن 72 شەتەلدىك قازاقستان رەسپۋبليكاسىنان شىعارىلدى.
"كوشى-قون جاعدايىن باقىلاۋ - ءبىزدىڭ قىزمەتىمىزدىڭ باسىم باعىتتارىنىڭ ءبىرى بولىپ تابىلادى. "زاڭسىز كەلۋشى" ءجاى اياسىندا كوشى-قون پوليسياسى، پاترۋلدىك قىزمەت، ۋچاسكەلىك ينسپەكتورلاردان قۇرالعان ءموبيلدى توپتار كۇن سايىن قالا كوشەلەرىنە شىعادى. ءبىز تەك شەتەلدىكتەردىڭ وزدەرى تاراپىنان عانا ەمەس، سونىمەن قاتار قازاقستان رەسپۋبليكاسىنىڭ زاڭناماسىن تولىق ورىندامايتىن قابىلداۋشىلار مەن جۇمىس بەرۋشىلەردىڭ تاراپىنان دا زاڭ بۇزۋشىلىقتاردى انىقتايمىز. بۇل كەشەندى جۇمىس، قوعامدىق قاۋىپسىزدىكتى جانە زاڭ تالاپتارىن ساقتاۋدى قامتاماسىز ەتۋگە باعىتتالعان"، - دەدى، الماتى قالالىق پوليسيا دەپارتامەنتى كوشى-قون قىزمەتى باسقارماسىنىڭ باستىعى ەركىن امانتايەۆ.