باعاناشىلداعى بالالار ءۇيىنىڭ تاربيەلەنۋشىلەرى جوندەۋ جۇمىستارى كەزەڭىندە ۋاقىتشا باسقا ورتالىققا كوشىرىلەدى
باعاناشىل ىقشام اۋدانىندا ورنالاسقان №2 بالالاردى قولداۋ ورتالىعىنىڭ عيماراتىنا رەكونسترۋكسيا جۇرگىزۋ جوسپارلانۋدا. جوندەۋ جۇمىستارى كەزىندە بالالار ۋاقىتشا №1 مەكتەپ-ينتەرناتقا ورنالاستىرىلادى. بۇل تۋرالى الماتى قالاسى اكىمىنىڭ ورىنباسارى ازامات قالدىبەكوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا حابارلادى.
بۇگىندە №2 بالالاردى قولداۋ ورتالىعىندا 100 تاربيەلەنۋشى بار، ولاردىڭ 13ء-ى – مەكتەپكە دەيىنگى جاستا، 87ء-سى – مەكتەپ وقۋشىلارى. بۇعان دەيىن باق-تا بالالاردى وبلىسقا كوشىرۋ ماسەلەسى تالقىلانعان بولاتىن، بارلىق تاربيەلەنۋشىلەردىڭ الماتىدا قالاتىنى جونىندە شەشىم قابىلداندى.
«پرەزيدەنتتىڭ تاپسىرماسىنا سايكەس ورتالىق عيماراتى تولىق جوندەۋدەن وتەدى. «ينتەگرا» ج ش س الەۋمەتتىك جاۋاپكەرشىلىك اياسىندا بۇل مىندەتتەمەنى ءوز موينىنا الىپ، بالالاردى كوشىرۋگە دايىن»، – دەپ اتاپ ءوتتى ازامات قالدىبەكوۆ.
بالالاردى ورنالاستىرۋ ماسەلەسى قالالىق ءبىلىم باسقارماسىنىڭ باقىلاۋىندا. باسقارما باسشىسى سايران سايفەدەنوۆتىڭ ايتۋىنشا، ۋچاسكە اۋماعىندا ەسكى نىساندى بۇزىپ، جاڭا عيمارات سالۋدى كوزدەيتىن جوبالىق-سمەتالىق قۇجاتتاما ازىرلەنۋدە.
«بالالاردى ءبىلىم باسقارماسىنا قاراستى №1 مەكتەپ-ينتەرناتقا كوشىرۋ ماسەلەسى شەشىلدى. ەكى اپتا بۇرىن بۇل ينتەرناتتا «جانۇيا» ارنايى ءۇيىنىڭ 90-نان استام تاربيەلەنۋشىسى تۇرعان بولاتىن. جالپى اۋماعى 1 113،1 شارشى مەتر، 18 بولمەدەن تۇراتىن عيماراتتا اعىمداعى جوندەۋ جۇمىستارى جۇرگىزىلدى. اپتا سوڭىنا قاراي بالالار كوشىپ، ورتالىق بوساتىلعاننان كەيىن قۇرىلىس كومپانياسى جوندەۋ جۇمىستارىنا كىرىسەدى»، – دەدى سايران سايفەدەنوۆ.
قازىرگى ۋاقىتتا قالادا ەرەكشە ءبىلىم بەرۋ قاجەتتىلىگى بار بالالارعا ارنالعان 8 ارنايى مەكتەپ-ينتەرنات جۇمىس ىستەيدى. وندا 2 668 وقۋشى ءبىلىم الىپ جاتىر (ونىڭ ىشىندە 1 794ء-ى ينتەرناتتا، 874ء-ى ۇيدە وقىتىلادى). سونىمەن قاتار ومىرلىك قيىن جاعدايعا تاپ بولعان كامەلەتكە تولماعاندارعا كومەك كورسەتەتىن 4 ۇيىم قىزمەت اتقارىپ كەلەدى. بۇل مەكەمەلەردە بارلىعى 446 بالا تاربيەلەنىپ وتىر.
سونداي-اق، 2025 جىلعى 20 قىركۇيەكتە الماتىدا قۇرىلىس كومپانياسى BI Group قاراجاتى ەسەبىنەن (6 ملرد تەڭگە كولەمىندە) سالىنعان جاڭا «جانۇيا» ارناۋلى كەشەنى اشىلعانى اتاپ ءوتىلدى. بۇل جوبا الەۋمەتتىك ماسەلەلەردى شەشۋدە مەملەكەت پەن بيزنەس ءتيىمدى جۇمىس ىستەي الاتىنىنا مىسال بولادى.