پرەزيدەنت ۇكىمەتتىڭ كەڭەيتىلگەن وتىرىسىندا اكىمدەرگە جاياۋ ءجۇرىپ، ءوز قالالارىن ارالاۋى كەرەكتىگىن ايتتى.
مەملەكەت باسشىسىنىڭ ايتۋىنشا، بۇل ماسەلەگە بيلىك وكىلدەرىمەن بىرگە حالىق تا نازار اۋدارۋى كەرەك، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«ءبىز قالالارىمىز بەن استانامىزدى كوركەيتۋگە بارىنشا ءمان بەرۋىمىز كەرەك. مويىنداۋ كەرەك، ءبىزدىڭ قالالارىمىز جاقسى كورىنبەيدى. ويىن الاڭدارى جابدىقتالماعان. شەتەلدە جۇرگەندە كورەمىز، ۇيلەر توزعان، بيۋدجەتى الدەقايدا از. ءبىراق سوعان قاراماستان، قالالار وتە جاقسى، تازا كورىنەدى. بۇل – مۋنيسيپالدى بيلىكتىڭ جۇمىسى. وعان قوسا قالا تۇرعىندارىنىڭ ءوز كوزقاراسى بار. بىزگە نە جەتپەيدى؟» - دەدى توقايەۆ.
ول اكىمدەر قالالارداعى پروبلەمانى كوزىمەن كورۋى ءۇشىن جاياۋ ءجۇرۋى كەرەك ەكەنىن ايتتى.
«ءبىز قالا تۇرعىندارىنىڭ ءوز كوشەلەرىنە، ۇيلەرىنە جانە تاعى باسقاعا نەمقۇرايلى قارايتىنىنا تاپ بولدىق. بۇل ەلىمىزدىڭ بەدەلىن تۇسىرۋگە جۇمىس ىستەيدى. مۇنداي ماسەلە ەلوردادا دا بار. ەلوردانىڭ جوعارى مارتەبەسى تەك قالا ورتالىعىنا عانا ەمەس، شەت ايماقتارعا دا ساي بولۋى كەرەك. قالالار وتە ناشار كورىنەدى. مۇندا بارلىق دەڭگەيدەگى اكىمدەر، ءماسليحات وكىلدەرى وتىر، وسىعان نازار اۋدارىڭىزدار. مىسالى، سەمەيدەگى بالالار الاڭىن كورسەتتى. ونى پايدالانۋ ءقاۋىپتى. اكىمدەر جاياۋ ءجۇرىپ، ءوز قالالارىن ارالاۋى كەرەك»، - دەدى توقايەۆ.