بيىل زاڭنامادان بيزنەس ءۇشىن 10 مىڭ كەرەكسىز تالاپ الىنىپ تاستالادى. بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە ۇكىمەت باسشىسى ءاليحان سمايىلوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پرەمەر-مينيستر قازىرگى ۋاقىتتا رەسپۋبليكادا بيزنەسكە قاتىستى كاسىپكەرلىك قىزمەت سالاسىندا جاڭا رەتتەۋشى ساياسات ەنگىزىلىپ جاتقانىن اتاپ ءوتتى. قاڭتار ايىنان باستاپ مىندەتتى تالاپتار رەەسترى اشىق تۇردە جاريالاندى.
«ەندى رەەستردە جوق تالاپتار بويىنشا تەكسەرۋلەر جۇرگىزىلمەيدى. بيىل زاڭنامادان بيزنەس ءۇشىن 10 مىڭ كەرەكسىز تالاپ الىنىپ تاستالادى. بۇل تەكسەرۋلەردىڭ سانىن ەداۋىر قىسقارتادى. سونداي-اق وسى جىلدىڭ سوڭىنا دەيىن تاۋەكەلدەردى باسقارۋ جۇيەلەرىن اۆتوماتتاندىرۋ تولىعىمەن اياقتالادى»، – دەدى پرەمەر-مينيستر.
ونىڭ ايتۋىنشا، بيىل شاعىن جانە ورتا بيزنەستى جۇيەلى تۇردە قولداۋ شارالارى كەڭەيتىلدى. وڭدەۋ ونەركاسىبىن دامىتۋ ماقساتىندا قولداۋ كورسەتىلەتىن قىزمەت تۇرلەرىنىڭ تىزبەسى (جەڭىلدەتىلگەن نەسيەلەر جانە قارجىلىق ليزينگ) 116-عا ۇلعايدى. ءبىرقاتار باسىم قىزمەتتەر بويىنشا پروسەنتتىك مولشەرلەمەنى سۋبسيديالاۋ مەرزىمى 5 جىلدان 7 جىلعا دەيىن ۇزارتىلدى.
بيزنەستىڭ جول كارتاسىن قارجىلاندىرۋ كولەمى 224 ملرد تەڭگەگە دەيىن ۇلعايدى. شاعىن جانە ورتا بيزنەستى قولداۋ اياسىندا بيىل 20 مىڭنان استام جوبانى سۋبسيديالاۋ، 18 مىڭنان استام جوباعا كەپىلدىك بەرۋ كوزدەلىپ وتىر. ورتا بيزنەستى قولداۋ بويىنشا قوسىمشا شارالار قابىلدانادى.