قالا تۇرعىندارى مەرەكەلىك كورىنىستەرگە ريزا بولدى.
الىپ شاھار الماتىدا ناۋرىزناما اياسىندا تەاترلاندىرىلعان كەرۋەن ءجۇرىپ ءوتتى.
وعان باتىر، بۇركىتشى، اقىن جانە باسقا دا وبرازداعى 1000-نان استام ادام قاتىستى.
سونىمەن قاتار، قالا تۇرعىندارى مەن قوناقتارى ارباداعى كيىز ءۇيدى، قىز كۇيمەسىن، قورجىنعا جىبەك ماتالار مەن كىلەمدەر ارتقان تۇيەلەردى، ات ۇستىگدەگى باتىرلاردى، قۇماي تازىلار مەن مەرگەنشىلەردى، جالپى جەتى قازىنا نىشاندارىن تاماشالادى.
دۋماندى شاراعا قاتىسقان قالا تۇرعىندارى مەن قوناقتارى مەرەكەلىك كورىنىستەرگە ريزا بولدى.
«مەن زەينەتكەرمىن، جاسىم 73-تە. بىرىنشىدەن بارلىقتارىڭىزدى ناۋرىز مەرەكەسىمەن قۇتتىقتاعىم كەلەدى. قاتەلەسپەسەم، مۇنداي ۇلكەن كوشتى سوڭعى رەت، ۇلى ابايدىڭ 150 جىلدىق مەرەيتويىندا كورگەن ەدىم. بۇگىن مىنەكەي، ەكىنشى رەت كۋا بولىپ وتىرمىن. جىلدا وسىلاي، تويلاي بەرەيىك»، - دەدى قالامىزدىڭ تۇرعىنى مارزيا ەرجان قىزى.
«كوش. ناۋرىز – دۋمان» مەرەكەلىك كەرۋەنى، اباي داڭعىلىنىڭ بويىمەن، باتىس باعىتتا دوستىق داڭعىلىنان ابىلاي حان داڭعىلىنا دەيىن، ودان كەيىن ابىلاي حان داڭعىلىمەن سولتۇستىك باعىتتا استانا الاڭىنا دەيىن ءجۇرىپ وتەدى.
وسىلايشا، ناۋرىز مەرەكەسى الماتىدا بار سان-سالتاناتىمەن تويلانىپ جاتىر.
