وزبەكستاندا اياعى اۋىر ايەلدەر مەن جاس بالاسى بار ايەلدەردى جۇمىستان قۋۋعا تىيىم سالىندى.
بۇل جايىندا islam.kz پورتالى kun.uz اقپارات كوزىنە سىلتەمە جاساي وتىرىپ ءمالىم ەتەدى، دەپ حابارلايدى aqshamnews.kz.
بۇل باعىتتاعى ءتيىستى تۇزەتۋلەر اتالعان ەلدىڭ ەڭبەك كودەكسىنە ەنگىزىلدى. سونداي-اق، زاڭ «ءبىرىڭعاي ۇلتتىق ەڭبەك جۇيەسى» ۆەدومستۆوارالىق كەشەنى ارقىلى ەڭبەك شارتتارىن ەلەكتروندى تۇرعىدان رەسىمدەۋگە كوشۋدى كوزدەيدى. بۇل شارا جۇمىسقا ورنالاستىرۋ پروسەدۋراسىن جەڭىلدەتۋگە باعىتتالعان.
سونىمەن قاتار، ورتاشا جالاقىنى، اقى تولەنبەيتىن دەمالىستىڭ ۇزاقتىعىن ەسەپتەۋ جانە قىزمەتكەرلەردى كەشكى نەمەسە سىرتتاي وقىتۋ ەرەجەلەرى ناقتىلاندى. مەملەكەتتىك ورگاندار ەندى اقپاراتتىق جۇيەلەر ارقىلى جۇمىسقا ورنالاسۋ ءۇشىن قاجەتتى قۇجاتتاردى دەربەس سۇراتاتىن بولادى. بۇل شارا بيۋروكراتيالىق كەدەرگىلەردى ەڭسەرۋگە ارنالعان. زاڭ رەسمي جاريالانعان كۇنىنەن باستاپ كۇشىنە ەنەدى.