كوروناۆيرۋستان كەيىن قۇرامىندا س دارۋمەنى بار تاعامداردى كوبىرەك تۇتىنعان ءجون.
كوۆيدپەن اۋىرىپ جازىلعاننان كەيىنگى كەزەڭدەگى تاماقتانۋ مەن قيمىل-قوزعالىس ەرەجەلەرىن دۇرىس ساقتاماعاننىڭ كەسىرىنەن كوپ ادامنىڭ جاعدايى ناشارلاپ، اۋرۋحاناعا قايتا جاتۋعا ءماجبۇر بولعاندارى دا بار.
COVID-19-دان كەيىن ناۋقاستاردىڭ يممۋنيتەتى كۇرت تومەندەيدى، اعزانىڭ كوپتەگەن فۋنكسياسى بۇزىلادى. دۇرىس تاڭدالعان تاعام جاسۋشالارداعى مەتابوليكالىق پروسەستەردى جىلدامداتادى، قاننىڭ قۇرامىن جاقسارتادى جانە يممۋندىق جۇيەنىڭ نىعايۋىنا دا اسەر ەتەدى. اعزاداعى زياندى قالدىقتاردى (شلاكتار مەن توكسيندەر) ۋاقتىلى جويۋ بۇيرەككە تۇسەتىن سالماقتى ازايتادى، باۋىر مەن جۇرەك-قانتامىر جۇيەسىنىڭ جۇمىسىن جەڭىلدەتەدى.
دارىگەرلەر كوروناۆيرۋس ىندەتىنەن جازىلعاننان كەيىنگى قالپىنا كەلتىرۋ كەزەڭىندە دۇرىس تاماقتانۋ قاعيداسىن ۇستانعان دۇرىس دەيدى.
«دۇرىس تاماقتانۋ بويىنشا: كۇندەلىكتى راسيوننىڭ 30%-ىن قامتيتىن مىندەتتى تاڭعى اس، جالپى كالوريا مولشەرىنىڭ 35% قۇرايتىن تۇسكى اس، ءبىر كۇندىك تاعامنىڭ 15% -نان اسپايتىن جەڭىل كەشكى اس ءىشىپ، اراسىندا ەكى رەت جۇرەك جالعاعان ءجون»، - دەيدى يرينا ۆورناچيەۆا.
كۇندەلىكتى تاماقتىڭ قۇرامىنا بۇزاۋ ەتى، تاۋىق ەتى، مايلى بالىق، باۋىر، جۇمىرتقا، ءسۇت ونىمدەرى، قاتتى ىرىمشىكتەر، كىلەگەي، قارا بيدايدان جانە تۇتاس ءداندى داقىلدان پىسىرىلگەن نان، وسىمدىك مايى، جارمالاردان پىسىرىلگەن بوتقالار، كوكونىستەر، جەمىستەر، جيدەكتەر، كوك شاي، مۇكجيدەك سۋسىندارى سياقتى ونىمدەردى قوسقان دۇرىس بولادى. كوروناۆيرۋستان كەيىن قۇرامىندا س دارۋمەنى بار تاعامداردى كوبىرەك تۇتىنعان ءجون: قىزىل بۇرىش، سيترۋس جەمىستەرى، قۇرما، الما. وكپەگە پايدالى بولۋ ءۇشىن پىسىرىلگەن ءسابىزدى قايماقپەن ارالاستىرىپ نەمەسە مەيىز بەن كەپتىرىلگەن ورىك قوسىپ جەۋگە بولادى. سونىمەن قاتار، اعزاعا جەتكىلىكتى مولشەردە سۋ بەرۋ كەرەك، ول ءۇشىن جەمىس سۋسىندارىن، كومپوتتاردى، يتمۇرىن نەمەسە مۇكجيدەكتى سۋعا قايناتىپ ىشكەن ءجون.
وڭالتۋ كەزەڭىندە اسقازانعا اۋىر، قۋىرىلعان جانە اششى تاعامداردى، «فاست-فۋدتى»، جارتىلاي فابريكاتتاردى، تەز دايىندالاتىن تاعامداردى داستارقانعا جولاتپاۋ كەرەك.
«مايونەز، كەچۋپ، مارگارين، گازدالعان سۋ، دۇكەننەن ساتىپ العان دايىن شىرىندار، ىستالعان ەت، مارينادتالعان قيار، الكوگول، شۇجىق ونىمدەرى، قويۋ كوفە مەن شايدى تاماقتانۋدان الىپ تاستاۋ كەرەك. ءتاتتى جانە تۇزدى تاعامداردى ۇناتاتىندار دا بۇل كەزەڭدە وزدەرىن شەكتەگەندەرى ءجون»، - دەيدى دارىگەر.