الماتى قالالىق پەريناتالدىق ورتالىعىنىڭ گينەكولوگى اسەل ومارقۇلوۆا ونلاين بريفينگتە ۆاكسينانىڭ ءبىرىنشى كومپونەنتىن العان جانە جۇكتىلىك تۋرالى كەيىن بىلگەن ايەلدەردى ەش الاڭداماۋعا شاقىردى، دەپ حابارلايدى almaty-akshamy.kz
«ەگەر ايەل ۆاكسينانىڭ ءبىرىنشى دوزاسىن الىپ، جۇكتى ەكەنىن بىلسە، مۇندا قورقاتىن ەشتەڭە جوق. ول ەكىنشى دوزانى الۋ ءۇشىن مەديسينالىق كومەككە جۇگىنەدى. جۇكتى ايەلدەردى ۆاكسينالاۋ ماسەلەسى بۇگىندە الەمدە تالقىلانىپ، قاراستىرىلىپ جاتىر. جۇكتىلىكتىڭ العاشقى ءۇش ايىندا ەگجەي-تەگجەيلى سكرينينگتىك زەرتتەۋدەن، ءۋدز-دى 11-13 اپتا ارالىعىندا ءوتۋ كەرەك»، - دەدى اسەل ومارقۇلوۆا.
ول مەديسينادا انا مەن ۇرىقتىڭ ءومىرىن ساقتاپ قالۋ ءۇشىن جۇكتىلىك كەزىندە ۆاكسينا الۋدىڭ كوپتەگەن مىسالى بار ەكەنىن تىلگە تيەك ەتتى. سەبەبى جۇكتى ايەلدەردە دە كوروناۆيرۋس ينفەكسياسىن جۇقتىرۋ ءقاۋپى بار.
«دۇنيەجۇزىلىك دەنساۋلىق ساقتاۋ ۇيىمى جۇكتى ايەلدەرگە كوروناۆيرۋسقا قارسى ۆاكسينا الۋدى ۇسىنادى. ۆاكسينا ۇرىققا ەنە المايدى جانە وعان ۆيرۋس جۇقپايدى، انا ءسۇتى دە ۆيرۋستان تازا بولادى»، - دەدى دارىگەر.
ونىڭ ايتۋىنشا، جاقىن ارادا جۇكتىلىكتى جوسپارلاپ وتىرعان ايەلدەرگە كۆي-گە قارسى ۆاكسينا الۋ قاجەت. سونىمەن قاتار، جۇكتىلىكتى ۆاكسينانىڭ ەكىنشى كومپونەنتىن العاننان كەيىن ءبىر ايدان كەيىن جوسپارلاعان ءجون.
«ۆاكسينالاۋ جۇكتىلىككە نەمەسە رەپرودۋكتيۆتى جۇيەگە ەشقانداي اسەر ەتپەيدى. ءبىزدىڭ ەلدە جۇكتى جانە بالا ەمىزەتىن ايەلدەرگە ەكپە سالۋ تۋرالى ءالى ايتىلعان جوق. دارىگەرلەر پرەپاراتتى ازىرلەۋشىلەر جۇرگىزگەن كلينيكالىق زەرتتەۋلەردىڭ رەسمي ناتيجەلەرىن كۇتۋدە. ۇسىنىمدار تۇسكەن بويدا ەشكىم ۆاكسينانى دەرەۋ قولدانبايدى. ءبارى ءقاۋىپسىز جاعدايدا ءارى ءوز رەتىمەن جاسالاتىن بولادى»، - دەدى اسەل ومارقۇلوۆا.