ۆيرۋس ءالى دە تاراپ جاتىر
كوروناۆيرۋس پاندەمياسىنىڭ اياقتالۋىنا بايلانىستى ەلدەگى بارلىق شەكتەۋ الىندى، دەپ حابارلايدى Almaty-akshamy.kz دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
"دۇنيەجۇزىلىك دەنساۋلىق ساقتاۋ ۇيىمىنىڭ COVID-19 پاندەمياسىنىڭ اياقتالۋى، قازاقستاندا جانە الەمدە كوروناۆيرۋس ينفەكسياسى بويىنشا ەپيدەميولوگيالىق جاعدايدىڭ تۇراقتانۋى تۋرالى حابارلاۋىنا بايلانىستى، ءبىلىم بەرۋ ۇيىمدارىندا، سونداي-اق Ashyq جوباسىندا حالىقتىڭ اراسىندا كوروناۆيرۋس ينفەكسياسىنا قارسى كۇرەس جونىندەگى شەكتەۋ شارالارىن كوزدەيتىن قازاقستان رەسپۋبليكاسى باس مەملەكەتتىك سانيتارلىق دارىگەرىنىڭ قاۋلىلارىنىڭ كۇشى جويىلدى"، - دەلىنگەن حابارلامادا.
وسىلايشا، "قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ كەيبىر قاۋلىلارىنىڭ كۇشىن جويۋ تۋرالى" قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ 2023 جىلعى 19 مامىرداعى №5 قاۋلىسىنا قول قويىلدى. وسى قاۋلىنىڭ تولىق ماتىنىمەن قازاقستان رەسپۋبليكاسى دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ سايتىندا تانىسۋعا بولادى.
"سونىمەن قاتار COVID-19 كوروناۆيرۋس ينفەكسياسى جويىلماعانىن حابارلايمىز، ۆيرۋس ءالى دە تاراپ جاتىر، ءبىراق اۋرۋدىڭ سالىستىرمالى تۇردە جەڭىل اعىمىن ەسكەرە وتىرىپ، كەيىننەن حالىقتىڭ سىرقاتتانۋشىلىعىن باقىلاۋ باسقا ۆيرۋستىق ينفەكسيالارمەن قاتار تۇراقتى نەگىزدە جۇزەگە اسىرىلادى"، - دەلىنگەن حابارلامادا.