بۇگىندە 250 مىڭنان اسا بالالار مەن جاسوسپىرىمدەر "جاس سارباز" رەسپۋبليكالىق بالالار-جاسوسپىرىمدەر قوزعالىسىنىڭ قۇرامىنا كىرەدى
قورعانىس ءمينيسترىنىڭ 2021 جىلعى 5 مامىرداعى بۇيرىعىمەن ەلىمىزدىڭ قارۋلى كۇشتەرىندە مادەنيەت جانە ونەر قىزمەتكەرلەرىنىڭ كاسىبي مەرەكەسى بەكىتىلگەن بولاتىن. ول مامىردىڭ ءار ءتورتىنشى جەكسەنبىسىندە اتاپ وتىلەدى، دەپ حابارلايدى Almaty-akshamy.kz.
شىعارماشىلىق وكىلدەرى وسكەلەڭ ۇرپاقتى تاربيەلەۋدە، قازاقستاننىڭ تاريحي مۇراسىن دارىپتەۋدە، اسكەري قىزمەتشىلەردىڭ بويىنداعى ءپاتريوتيزمدى دامىتۋدا جانە جاۋىنگەرلىك رۋحىن ارتتىرۋدا ماڭىزدى ءرول اتقارادى. قارۋلى كۇشتەردە بۇل سالادا 2015 جىلى قۇرىلعان ۇلتتىق اسكەري-پاتريوتتىق ورتالىعى قىزمەت ەتىپ كەلەدى.
ەلورداداعى بۇل كوپفۋنكسيونالدى مەكەمەنىڭ قۇرامىندا ورتالىق انسامبل، ورتالىق اسكەري وركەستر جانە قارۋلى كۇشتەردىڭ مەملەكەتتىك اسكەري-تاريحي مۋزەيى بار. جاستاردى اسكەري-پاتريوتتىق تۇرعىدا تاربيەلەۋدەگى اۋقىمدى جۇمىستى ۇلتتىق اسكەري-پاتريوتتىق ورتالىعىنىڭ الماتى فيليالى دا جۇرگىزۋدە. سونىمەن قاتار قارۋلى كۇشتەردىڭ باسقا دا گارنيزوندارىندا وسىنداي مەكەمەلەر قۇرۋ جوسپاردا بار.
بۇگىندە 250 مىڭنان اسا بالالار مەن جاسوسپىرىمدەر "جاس سارباز" رەسپۋبليكالىق بالالار-جاسوسپىرىمدەر قوزعالىسىنىڭ قۇرامىنا كىرەدى. بالالار اسكەري-پاتريوتتىق كلۋبتاردا، "جاس سارباز" سىنىپتارىندا جانە Smart Sarbaz ۇيىرمەلەرىندە اسكەري ءىستىڭ نەگىزدەرىن مەڭگەرۋدە. ەلوردا مەن الماتىنىڭ ۇلتتىق اسكەري-پاتريوتتىق ورتالىعى جانىنان قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ اسكەري قىزمەتشىلەرىنىڭ بالالارىنا ارنالعان دومبىرا، ۆوكال، حورەوگرافيا سىندى شىعارماشىلىق ستۋديالار اشىلعان. ولاردىڭ ىشىندەگى مىقتىلارى جىل سايىن وتەتىن "ايبىن" رەسپۋبليكالىق جاستار جيىنىندا ءوز جەتىستىكتەرىن كورسەتۋگە مۇمكىندىك الادى.
قازاقستانداعى ەڭ ءىرى مەملەكەتتىك اسكەري-تاريحي مۋزەيدە جيىرما مىڭنان استام ەكسپونات ساقتاۋلى. ولاردىڭ اراسىندا ۇلى وتان سوعىسىنىڭ ارداگەرلەرى مەن بەلگىلى مەملەكەت قايراتكەرلەرىنىڭ ۇرپاقتارى سىيعا تارتقان وتباسىلىق جادىگەرلەر دە بار. مۇندا بوگەنباي، ايداربەك، قوجابەرگەن جانە باسقا باتىرلاردىڭ قارۋ-جاراعى مەن ساۋىت-سايماندارى ساقتالعان.
بيىلعى جىلى ءۇاپو جانىنان كوكتەمدە اسكەرگە شاقىرىلعان مەرزىمدى قىزمەتتەگى ساربازداردان شىعارماشىلىق ۆزۆود قۇرىلدى. اسكەري بورىشىن وتەگەن جاستارعا جاڭا مۇمكىندىكتەر اشىلىپ وتىر. ولار جوو-عا جەڭىلدىكپەن تۇسە الادى نەمەسە قارۋلى كۇشتەردىڭ شىعارماشىلىق ۇجىمدارىندا كەلىسىمشارت بويىنشا قىزمەتىن جالعاستىرۋىنا بولادى.
وڭىرلەردە 21 اسكەري وركەستر جۇمىس ىستەيدى.
حالىقارالىق ىنتىماقتاستىق شەڭبەرىندە بۇل ورتالىقتىڭ ۇجىمى شانحاي ىنتىماقتاستىق ۇيىمىنا مۇشە مەملەكەتتەردىڭ "بەيبىتشىلىك كەرنەيى" حالىقارالىق اسكەري وركەسترلەر فەستيۆالىنە، "امۋر تولقىنى" حالىقارالىق اسكەري-مۋزىكالىق فەستيۆالىنە (حاباروۆسك ق.، رەسەي)، V حالىقارالىق اسكەري وركەسترلەر فەستيۆالىنە (نانچان ق.، قحر)، حالىقارالىق ارميا ويىندارىنا (ق. ماسكەۋ، رەسەي) قاتىستى.
ارميانىڭ جاۋىنگەرلىك رۋحى، ونىڭ جاۋىنگەرلىك قابىلەتى پاتريوتيزمگە جانە جاۋىنگەردىڭ وتان قورعاۋشىنىڭ ۇلى ميسسياسىنا دەگەن شىنايى سەنىمىنە بايلانىستى. قازاقستان قارۋلى كۇشتەرىنىڭ مادەنيەتى مەن ونەرىنىڭ تالانتتى وكىلدەرى اسكەردىڭ ماڭىزىن ونەرمەن دارىپتەۋگە، نىعايتۋعا جانە بەدەلىن كوتەرۋگە ىقپال ەتىپ كەلەدى.