كوروناۆيرۋس ينفەكسياسىن جۇقتىرۋ بويىنشا الماتى ەكىنشى ورىندا

ەل تۇرعىندارى قانداي اۋرۋلارعا ءجيى شالدىعادى؟

قازاقستاندا وتكەن جىلى تىنىس الۋ ورگاندارىنىڭ اۋرۋلارىنان 21 مىڭعا جۋىق ادام قايتىس بولدى، ولاردىڭ 195ء-ى - ءبىر جاسقا دەيىنگى نارەستە، دەپ حابارلايدى Almaty-akshamy.kz قازاقپاراتقا سىلتەمە جاساپ. 

2021 جىلى انىقتالماعان جوعارعى تىنىس الۋ جولدارىنىڭ جەدەل ينفەكسياسى ەڭ كوپ تىركەلگەن اۋرۋ ءتۇرى بولدى. بۇل دياگنوز 1،2 ميلليون ادامعا قويىلعان. ودان كەيىن COVID-19: 870،8 مىڭ ادام جۇقتىرعان، ولاردىڭ 832،8 مىڭى – يدەنتيفيكاسيالانعان ۆيرۋس.

سونىمەن قاتار، جەلشەشەك (16،4 مىڭ ادام زارداپ شەكتى) پەن ءجىتى ىشەك ينفەكسيالارىنىڭ توبىنا جاتاتىن سىرقات (8،9 مىڭ ادام) تۇرلەرى كۇرت ارتتى. ودان بولەك، 3،5 مىڭ ادامدا ايتۆ ينفەكسياسى (ادامنىڭ يممۋنيتەت تاپشىلىعىنىڭ ۆيرۋسى)، 4،6 مىڭ ادامدا سوزىلمالى ۆيرۋستىق گەپاتيتتەر، 2،3 مىڭ ادامدا مەرەز انىقتالدى. 18 جاسقا دەيىنگىلەر انىقتالماعان جوعارعى تىنىس الۋ جولدارىنىڭ جەدەل ينفەكسياسىنان كوپ زارداپ شەكتى - 627،5 مىڭ بالا. 538 بالادان تۋبەركۋلەز انىقتالدى.

تىنىس الۋ ورگاندارىنىڭ اۋرۋلارىنان 20،8 مىڭ ادام، جۇقپالى جانە پارازيتتىك اۋرۋلاردان 1،4 مىڭ ادام قايتىس بولدى. تىنىس الۋ ورگاندارىنىڭ اۋرۋلارىنان قايتىس بولعان بالالار سانى ءبىر جىلدا 12،9% ازايىپ، 195 بولدى. ال جۇقپالى جانە پارازيتتىك اۋرۋلاردان كوز جۇمعان بالالار سانى 26،8% ازايدى - 180 بالا. COVID-19-عا كەلەر بولساق، وڭىرلەر اراسىندا ۆيرۋستى ەڭ كوپ جۇقتىرۋ جاعدايى نۇر-سۇلتاندا تىركەلگەن: 10 مىڭ ادامعا 1118 جاعداي. ودان كەيىن الماتى (10 مىڭ ادامعا 824 جاعداي) جانە قاراعاندى (10 مىڭ ادامعا 711 جاعداي) وبلىستارى تۇر.