كوروناۆيرۋس. فرانسيا شەكارالىق باقىلاۋدى كۇشەيتتى

ازيا ايماعىندا كوروناۆيرۋستىڭ تارالۋ قارقىنى تومەندەمەي تۇر

بۇگىننەن باستاپ فرانسيا ەۋروپا ەلدەرىندە covid-19 ۆيرۋسىنىڭ بەلسەندى تارالۋىنا بايلانىستى شەكارالىق باقىلاۋدى كۇشەيتۋدە، دەپ حابارلايدى Almaty-akshamy.kz COVID-19 تارالۋىنا جول بەرمەۋ جونىندەگى ۆاك-قا سىلتەمە جاساپ. 

شەكارادان ءوتۋ ءۇشىن 12 جاستان اسقان ازاماتتاردا 48 ساعاتتان ەرتە ەمەس تاپسىرىلعان تەرىس ناتيجەلى پتر انىقتاماسى بولۋى قاجەت. سونىمەن قاتار ەل بيلىگى covid-19 بويىنشا كۇردەلى ەپيدەميولوگيالىق جاعدايى بار ەلدەر ءۇشىن قوسىمشا ءتۇس بەلگىلەرىن ەنگىزدى. مىسالى، «وميكرون» شتاممىن جۇقتىرۋ جاعدايلارى انىقتالعان مەملەكەتتەر قىزىل تۇسپەن بەلگىلەنگەن. قازىرگى ۋاقىتتا فرانسيانىڭ 5 ايماعىندا وسى شتامدى جۇقتىرۋدىڭ 9 جاعدايى انىقتالدى.

ازيا ايماعىندا كوروناۆيرۋستىڭ تارالۋ قارقىنى تومەندەمەي تۇر. ۆەتنامدا ءبىر كۇندە 13 670 SARS-CoV-2 تاسىمالداۋشىسى انىقتالدى. دەنساۋلىق ساقتاۋ مينيسترلىگى حوشيمين مەن ەل استاناسى حانويدا وتە جوعارى كورسەتكىشتەر تىركەلگەنىن اتاپ ءوتتى. ۆيرۋس جۇقتىرعانداردىڭ باسىم بولىگى ۆەتنامنىڭ وڭتۇستىگىندە جانە ورتالىق بولىگىندەگى پروۆينسيالاردا انىقتالدى. پاندەميا باستالعاننان بەرى راستالعان جاعدايلاردىڭ جالپى سانى 1 280 780-گە جەتتى. ەلدەگى ۆاكسيناسيا قارقىنى ءالى دە كۇشەيتۋدى قاجەت ەتەدى، بۇگىنگى كۇنى 97 ميلليوننان استام تۇرعىننىڭ 53 ميلليونعا جۋىعى ۆيرۋسقا قارسى ەگىلدى.