ۇلاندىقتار كوپىردەن سەكىرگىسى كەلگەن جىگىتتى توقتاتتى

ءومىر سۇرگىم كەلمەيدى...

وقيعا 3 جەلتوقسان كۇنى كەشكى ساعات 21.30 شاماسىندا ورىن الدى.  پترۋلدىك-بەكەتتىك قىزمەت اتقارۋ بارىسىندا ۇلتتىق ۇلان 5573 اسكەري ءبولىمىنىڭ اسكەري قىزمەتشىلەرى ءوز ەركىمەن ومىرىمەن قوشتاسقىسى كەلگەن ارەكەتكە توسقاۋىل قويدى، دەپ حابارلايدى Almaty-akshamy.kz.
 
ق ر ۇلتتىق ۇلانىنىڭ باسپا ءسوز قىزمەتىنىڭ مالىمەتىنشە، ەر جىگىت ەسىل وزەنىندەگى كوپىردەن سەكىرگىسى كەلگەن.  

قوعامدىق ءتارتىپتى قامتاماسىز ەتۋ بويىنشا قىزمەت اتقارۋ بارىسىندا اسكەري جاساق باستىعى قاتارداعى حاكىمجان سارباسوۆ جانە پاترۋلشىلەر ماكسيم ريۋمينا جانە رولاند اراپييەۆپەن بىرگە وزەن بويىن جاعالاپ كەلە جاتىپ، سارىارقا كوشەسىنىڭ بويىنداعى كوپىردەن «ءومىر سۇرگىم كەلمەيدى، ولگىم كەلەدى» دەگەن جىگىتتىڭ داۋىسىن ەستيدى.  

«كوپىردەن سەكىرگىسى كەلگەن جىگىتتى كورىپ، ءبىز دەرەۋ وعان قاراي اسىقتىق. ەر ازامات «Radisson» ءقوناقۇيىنىڭ قاسىنداعى كوپىردە تۇردى. وسى ۋاقىتتا ول قورشاۋدىڭ ارعى جاعىنا ءوتىپ ۇلگەردى. جاس جىگىت كوپىردەن سەكىرەمىن دەپ، سۋيسيد جاساعىسى كەلدى»، - دەيدى  ۇلاندىق جاۋىنگەر حاكىمجان سارباسوۆ. 

اسكەري قىزمەتشىلەر ازاماتپەن سويلەسىپ، ونى باستاپقى ويىنان باس تارتۋعا شاقىردى. وسى ساتتە جاقىندا كەتىپ بارا جاتقان باسقا دا تۇرعىندار ازاماتتىڭ وقىس قىلىق جاساماۋىن ءوتىندى. كەيىن ۇتىمدى ءساتتى پايدالانا وتىرىپ، اسكەريلەر مەن ازاماتتار قىل ۇستىندە تۇرعان جىگىتتى كوپىردىڭ ارعى جاعىنان الىپ شىقتى. بۇدان سوڭ ونى جۇباتىپ، اسكەري جاساقتار بويىنشا كەزەكشىگە تاپسىردى.  

2003 جىلعى ازامات ءارى قاراي ءمان-جايدى انىقتاۋ ءۇشىن سارىارقا اۋدانىنىڭ پوليسيا باسقاراماسىنا جەتكىزىلدى.