الماتىدا شامعون ساعاددين ۇلى قاجىعالييەۆتىڭ جانە تىلەس شامعون ۇلى قاجىعالييەۆتىڭ قۇرمەتىنە مەموريالدىق تاقتا اشىلدى.
الماتىدا كاسىبي ديريجەر، كورنەكتى قايراتكەر، كسرو حالىق ءارتيسى، حح عاسىرداعى قازاق مۋزىكاسىنىڭ قايتالانباس ءبىرتۋار الىپ تۇلعالارىنىڭ ءبىرى شامعون ساعاددين ۇلى قاجىعالييەۆتىڭ جانە كومپوزيتور، قازاقستاننىڭ ەڭبەك سىڭىرگەن ونەر قايراتكەرى تىلەس شامعون ۇلى قاجىعالييەۆتىڭ قۇرمەتىنە ورناتىلعان مەموريالدىق تاقتانىڭ سالتاناتتى اشىلۋ ءراسىمى ءوتتى.
مەموريالدىق تاقتا مەدەۋ اۋدانى، قاراساي باتىر جانە پۋشكين كوشەلەرىنىڭ قيىلىسىنداعى كورنەكتى تۇلعالار تۇرعان ۇيدە ورناتىلدى.
سالتاناتتى راسىمگە الماتى قالاسى اكىمدىگىنىڭ وكىلى ارمان حالبەكوۆ، قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشيەۆ، قازاقستاننىڭ ەڭبەك سىڭىرگەن قايراتكەرى سەرىك جەكسەمبەك ۇلى ەركىمبەكوۆ جانە وزگە دە زيالىلار، سونداي-اق قازاق قايراتكەرلەرىنىڭ تۋعان-تۋىستارى قاتىستى.
- بۇگىن ءبىز كسرو حالىق ءارتيسى، حح عاسىرداعى قازاق مۋزىكاسىنىڭ قايتالانباس ءبىرتۋار الىپ تۇلعالارىنىڭ ءبىرى شامعون ساعاددين ۇلى قاجىعالييەۆ جانە كومپوزيتور، قازاقستاننىڭ ەڭبەك سىڭىرگەن ونەر قايراتكەرى تىلەس شامعون ۇلى قاجىعالييەۆتىڭ تۇرعان ۇيىنە مەموريالدىق تاقتا قويۋ سالتاناتىندا باس قوسىپ تۇرمىز. تىلەس قاجىعالييەۆ – قازىرگى زاماننىڭ دارىندى كومپوزيتورى. حح عاسىردىڭ ەكىنشى جارتىسىنداعى قازاقستاننىڭ شىعارماشىلىق زيالىلاردىڭ كورنەكتى وكىلى. دانا حالقىمىز "جاقسىدان جاقسى تۋار جارقىلداعان" دەپ بەكەر ايتپاسا كەرەك. ونەر الەمىنىڭ قوس تارلانىنىڭ ونەگەلى ءومىرى، جارقىن بەينەسى، عيبراتى مول ەڭبەكتەرى حالقىمىزدىڭ جادىندا ماڭگى ساقتالادى، – دەدى الماتى قالاسى اكىمدىگىنىڭ وكىلى ارمان حالبەكوۆ.
سونداي-اق، بۇگىن مەموريالدىق تاقتا اشىلۋ راسىمىنەن كەيىن قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ عيماراتىندا ديريجەر، پروفەسسور، كسرو حالىق ءارتيسى، مەملەكەتتىك سىيلىقتىڭ لاۋرەاتى، «وتان»، «پاراسات» وردەندەرىنىڭ يەگەرى شامعون ساعاددين ۇلى قاجىعالييەۆتىڭ 95 جىلدىعىنا ارنالعان «سەرپىن اتتى كەشى وتەدى.
ايتا كەتكەن ءجون، شامعون ساعاددين ۇلى قاجىعالييەۆ - كورنەكتى قايراتكەر، كاسىبي-مامان، ديريجەر. كسرو حالىق ءارتيسى، «وتان»، «پاراسات» وردەندەرىنىڭ يەگەرى. حح عاسىرداعى قازاق مۋزىكاسىنىڭ قايتالانباس ءبىرتۋار الىپ تۇلعالارىنىڭ ءبىرى.
ش.قاجىعالييەۆ 1944 جىلى الماتى مەملەكەتتىك كونسەرۆاتورياسىنا وقۋعا ءتۇسىپ، 1947-1950 جىلدارى پروفەسسور ي.ا.لەسماننان سكريپكا، ق.جانتىلەۋوۆتەن دومبىرا، ل.م. شارگورودسكييدەن ديريجەر ماماندىعى بويىنشا ءدارىس الادى. كەيىن ە.گريكۋروۆتان وقىپ، ءبىلىمىن تولىقتىرادى. ەڭبەك جولىن 1946 جىلى اكادەميك ا.جۇبانوۆتىڭ اسسيستەنتى بولىپ باستايدى. تابيعات سىيلاعان عاجايىپ تالانتى، زور ەڭبەكتەرى ونى الەمدىك دەڭگەيگە كوتەرىپ، زور ەڭبەكتەرى اتاق-داڭققا بولەدى.
1966 جىلى لەنينگراد كونسەرۆاتورياسىن وپەرا جانە سيمفونيالىق ديريجەرلاۋ ماماندىعى بويىنشا ءتامامداپ، 1968-1971 جىلدارى ارالىعىندا كازسسر مەملەكەتتىك سيمفونيا وركەسترىن باسقارعان. 1982 جىلى ونەردەگى تولاعاي تابىستارى ءۇشىن مەملەكەتتىك سىيلىقتىڭ لاۋرەاتى اتاعى بەرىلگەن. 1967-1988 جىلدارى قازاق وركەسترلەرىنە كاسىبي مامان ديريجەرلاردى وقىتىپ دايارلاۋ ماقساتىمەن الماتى مەملەكەتتىك كونسەرۆاتورياسىندا كافەدرا اشىپ مەڭگەرۋشى قىزمەتىن اتقارعان. 1952-1991 جىلدار ارالىعىندا قۇرمانعازى وركەسترىنىڭ باس ديريجەرى جانە كوركەمدىك جەتەكشىسى، ءارى ديرەكتورى بولىپ قىزمەت اتقارعان. ش.قاجىعالييەۆ ەلىمىزدىڭ مادەني ومىرىندەگى كوپتەگەن جاڭالىقتاردىڭ جارشىسى بولدى. 1953 جىلى قۇرمانعازى وركەسترى بۋحارەستتە وتكەن دۇنيەجۇزىلىك فەستيۆالگە قاتىسىپ قازاق ونەرىنە العاشقى «التىن» جۇلدىزدى اكەلگەن.
1991-2005 جىلدارى قاراعاندى وبلىسى، ق. بايجانوۆ اتىنداعى كونسەرتتىك بىرلەستىكتىڭ شاقىرتۋىمەن تاتتىمبەت اتىنداعى وركەستردىڭ كوركەمدىك جەتەكشىسى جانە باس ديريجەرى قىزمەتىن اتقارعان.
2005-2015 جج. الماتىعا ورالىپ، ءومىرىنىڭ سوڭىنا دەيىن ءوزىنىڭ سۇيىكتى ۇجىمى - قۇرمانعازى وركەسترىنىڭ كوركەمدىك جەتەكشىسى قىزمەتىن اتقاردى.