كوركەم ادەبيەتتى باسىپ شىعارۋمەن اينالىساتىن باسپالاردىڭ جۇمىسىنا قولداۋ جاسالادى. بۇل تۋرالى بۇگىن پارلامەنت ماجىلىسىندە قازاق تىلىندەگى كوركەم ادەبيەتتىڭ باسپا يندۋسترياسىن دامىتۋ تاقىرىبىنداعى جيىندا پالاتا دەپۋتاتى اسحات ايماعامبەتوۆ ايتتى، دەپ حابارلايدى اlmaty-akshamy.kz.
«دەپۋتاتتار وسى باعىت بويىنشا باستاما جاساعان ەدى. ونىڭ اياسىندا ارنايى زاڭ جوباسى دايىندالىپ، سوعان ءبىرقاتار تۇزەتۋ ەنگىزىلىپ، قۇجات ۇكىمەتتىڭ قورىتىندىسىن الۋعا جولداندى. بۇل زاڭ جوباسى 2 اپتا ىشىندە پارلامەنتكە ەنگىزىلگەننەن كەيىن، بىزدە جۇمىس توبى قۇرىلادى»، - دەدى ا. ايماعامبەتوۆ.
ونىڭ ايتۋىنشا، اۆتورلىق قۇقىق بويىنشا ۇسىنىستار دا اتالعان زاڭ جوباسىندا ەسكەرىلەدى.
«سالاداعى سالىق بويىنشا جەڭىلدىكتەردى قاراستىرامىز. بۇل ءوز كەزەگىندە مەملەكەتتىڭ كىرىسىنە ايتارلىقتاي نۇقسان كەلتىرمەيدى دەپ سانايمىز. سالىق جەڭىلدىكتەرى ناقتى وسى سەكتوردى قولداۋعا ءتيىمدى قادام بولماق. ەكىنشىدەن، سۋبسيديا بەرۋ ماسەلەسى دە ماڭىزدى. ءبىراق سۋبسيديانى ءتيىمدى تاسىلدەرمەن ىسكە اسىرۋىمىز كەرەك. قولداۋدى قاجەت ەتەتىن باسپالارعا نەمەسە اۆتورلارعا بەرۋدى قاراستىرعان ءجون. سوندىقتان سۋبسيديانى ەگجەي-تەگجەيلى تالقىلايمىز»، - دەدى دەپۋتات.
بۇدان بۇرىن حابارلانعانداي، ءماجىلىس دەپۋتاتى جۇلدىز سۇلەيمەنوۆا كىتاپ باسۋ سالاسىنداعى سۋبسيديا ماسەلەسىن دە پىسىقتاۋ كەرەك ەكەنىن ايتتى.
حالىقارالىق «قازاق ءتىلى» قوعامدىق بىرلەستىگىنىڭ پرەزيدەنتى راۋان كەنجەحان ۇلى مەملەكەتتىك كىتاپحانالاردىڭ قورىن ءبىر جەردەن سيفرلاندىرۋدى ۇسىندى.