ەۋروپالىق پارلامەنتتىڭ كەزەكتى كوشپەلى سەسسياسى بارىسىندا ستراسبۋرگ قالاسىندا (فرانسيا) كومىر جانە بولات جونىندەگى ەۋروپالىق بىرلەستىكتىڭ (كبەب) جالپى اسسامبلەياسىنىڭ قۇرىلعانىنا 70 جىل تولۋىنا ارنالعان سالتاناتتى ءراسىم ءوتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ەو پارلامەنتىنىڭ باسپا ءسوز قىزمەتى اتاپ وتكەندەي، 1952 جىلى قۇرىلعان كومىر جانە بولات جونىندەگى ەۋروپالىق بىرلەستىگىنىڭ جالپى اسسامبلەياسى - ەۋروپارلامەنتتىڭ الدىندا قۇرىلعان ۇيىم.
1952 جىلى اسسامبلەياعا مۇشە ءاربىر مەملەكەتتىڭ ۇلتتىق پارلامەنتتەرىنەن تاعايىندالعان 78 پارلامەنتشى كىردى. 1958 جىلى ەۋروپالىق ەكونوميكالىق قوعامداستىق پەن ەۋروپالىق اتوم ەنەرگياسى قاۋىمداستىعى قۇرىلعاننان كەيىن ەكبب جالپى اسسامبلەياسى كەڭەيتىلىپ، «ەۋروپالىق پارلامەنتتىك اسسامبلەيا» بولىپ وزگەرتىلدى. 1962 جىلى ورگان «ەۋروپالىق پارلامەنت» اتاۋىن قابىلدادى.
سالتاناتتى شارانى ەۋروپارلامەنت ءتوراعاسى روبەرتا مەتسولا اشتى. ول كومىر جانە بولات جونىندەگى ەۋروپالىق بىرلەستىكتىڭ (ەكبب) جالپى اسسامبلەياسىنىڭ ءبىرىنشى وتىرىسىنان كەيىنگى 70 جىل ىشىندە اسسامبلەيانىڭ تەك نىعايىپ كەلە جاتقانىن اتاپ ءوتتى.
«ەۋروپالىق پارلامەنت تىكەلەي داۋىس بەرۋ ارقىلى سايلاناتىن الەمدەگى جالعىز وكىلدى ورگان بولدى. ول – كوپتىلدى، كوپپارتيالى جانە ترانسۇلتتىق پارلامەنت»، - دەدى ول.
سالتاناتتى شارا ليۋدۆيگ ۆان بەتحوۆەننىڭ «قۋانىش تۋرالى ودا» تۋىندىسىمەن اياقتالدى.