پاۆلوداردا ينەلىككە ەسكەرتكىش قويىلدى

 پاۆلودارلىقتار ينەلىككە قۇرمەت كورسەتتى

تەمىردەن سوعىلىپ، تۇعىرى بەتوننان قۇيىلعان ينەلىكتى گۇلزاردىڭ ۇستىنە قوندىرۋ جوسپارلانىپ وتىر. ال تاپسىرىستى ساياباقتى اباتتاندىرىپ جاتقان مەردىگەر فيرما بەرگەن، دەپ حابارلايدى اlmaty-akshamy.kz "حابار 24"-كە سىلتەمە جاساپ.

جالپى، بۇل جاندىككە دەگەن پاۆلودارلىقتاردىڭ قۇرمەتى بولەك. ءتىپتى ينەلىكتى  قالانىڭ سيمۆولىنا اينالدىرۋ كەرەك دەگەن باستاما دا كوتەرىپ ءجۇر. ويتكەنى جاز شىعا ەرتىس ءوڭىرىنىڭ حالقى قانسورعىش جاندىكتەردەن زارداپ شەگەدى. ماسا-شىركەيلەردى جويۋعا بيۋدجەتتەن قىرۋار قارجى دا بولىنەدى. ءبىراق اتقارىلعان جۇمىس تيىمدىلىگىن كورسەتە بەرمەيدى. تەك ينەلىك شىققاندا عانا زيانكەستەردىڭ كوزى جوعالادى. ماسەلەن، ءبىر ينەلىك ەكى ساعاتتا 40 شاقتى شىبىن-شىركەيدى جويادى ەكەن.

"مىناۋ ينەلىك تەمىردەن جاسالعان. تەمىردەن جاساۋ قيىن، وڭاي ەمەس. سوندىقتان بۇل دەكوراتيۆتى سكۋلپتۋرا. قاناتى دا مىناداي شىنىمەن قاپتالعان. قاسىمداعى جىگىت ەكەۋىمىز ءتورت جىلدان بەرى بىرگە ىستەيمىز، وسى قالادا، باسقا جاقتاردا ءمۇسىن جاسايمىز"، - دەيدى ءمۇسىنشى مارات ءابىلقاسىموۆ.