قاتاردا ءوتىپ جاتقان فۋتبولدان 2022 جىلعى الەم چەمپيوناتىنىڭ ءتورتىنشى ويىن كۇنىندە، 23 قاراشادا، ە توبىندا ەكى كەزدەسۋ وتەدى
العاشقىسى گەرمانيا جانە جاپونيا اراسىندا بولادى. ويىن ەلوردا ۋاقىتىمەن 19:00-دە باستالىپ، «Qazaqstan» جانە «Qazsport» تەلەارنالارىنان تىكەلەي ەفيردە كورسەتىلەدى.
گەرمانيا قۇراماسى الەم چەمپيوناتىنىڭ فينالدىق ساتىسىنا 20-شى مارتە قاتىسقالى وتىر. بۇعان دەيىن 1954، 1974، 1990، 2014 جىلداردا چەمپيون اتانسا، 1966، 1982، 1986، 2002 جىلداردا كۇمىس، 1934، 1970، 2006، 2010 جىلداردا قولا جۇلدەگەر بولدى.
ولاردىڭ قارسىلاسى - جاپونيا ءدۇبىرلى دودادا جەتىنشى مارتە ب ا ق سىنايدى. ولار 2002، 2010، 2018 جىلداردا 1/8 فينالعا دەيىن جەتتى.
ەكى قۇراما ءۇشىنشى مارتە شەبەرلىك بايقاسادى. العاشقى ەكەۋى جولداستىق كەزدەسۋ رەتىندە وتكىزىلگەن. 2004 جىلى گەرمانيا 3:0 ەسەبىمەن جەڭىسكە جەتسە، 2006 جىلى 2:2 ەسەبىمەن تەڭ تارقاستى.
اتالعان توپتاعى تاعى ءبىر كەزدەسۋدە يسپانيا مەن كوستا-ريكا شەبەرلىك بايقاسادى. ويىن ەلوردا ۋاقىتىمەن 22:00-دە باستالىپ، ونى «Qazaqstan» تەلەارناسىنان تىكەلەي ەفيردە تاماشالاۋعا بولادى.
الەمدىك فۋتبولدا وزىندىك ورنى بار يسپانيا ءدۇبىرلى دوداعا 17ء-شى مارتە كەلدى. قازىرگە دەيىن 2010 جىلى چەمپيوندىق تۇعىرعا كوتەرىلدى.
ال كوستا-ريكا فۋتبولشىلارى ايتۋلى الامانعا جەتىنشى مارتە قادام باستى. ازىرگە ەڭ جوعارى جەتىستىگى رەتىندە 2014 جىلى 1/4 فينالعا دەيىن جەتكەندىگىن ايتۋعا بولادى.
ەكى قۇراما بۇعان دەيىن ءۇش مارتە كەزدەستى. ونىڭ ەكەۋىندە يسپانيالىق فۋتبولشىلارى باسىم تۇسسە، ءبىر كەزدەسۋ تەڭ ناتيجەمەن اياقتالدى.