كونسەرۆىلەنگەن قيار جەپ اۋرۋحاناعا ءتۇستى

تۇركىستان وبلىسىندا سوڭعى ءبىر اپتادا 2 ادام بوتۋليزمگە شالدىقتى.

ولار سوزاق جانە ورداباسى اۋداندارىنىڭ 34-39 جاستاعى تۇرعىندارى، دەپ حابارلايدى Almaty-akshamy.kz.

انىقتالعانداي، ولار ءۇي جاعدايىندا دايىندالعان كونسەرۆىلەنگەن قيار تۇتىنعان. ناتيجەسىندە ەكى ازاماتتا دا مازاسىزدانۋ، قۇسۋ، باس اينالۋ، جۇتىنا الماۋ سىندى بوتۋليزمگە ءتان كلينيكالىق كورىنىستەر بايقالعان. سوزاق اۋدانىنىڭ 34 جاستاعى تۇرعىنى اۋىر حالدە اۋداندىق اۋرۋحانانىڭ جانساقتاۋ بولىمىنە جاتقىزىلسا، ورداباسى اۋدانىنىڭ 39 جاستاعى تۇرعىنى اۋداندىق اۋرۋحانادا ەم الۋدا. جاعدايى ءبىرقالىپتى. 

اتالعان جايت بويىنشا سانيتاريالىق-ەپيدەميولوگيالىق باقىلاۋ باسقارماسىنىڭ قىزمەتكەرلەرى ەمدەۋ مەكەمەلەرى تاراپىنان تۇسكەن جەدەل حابارلاما نەگىزىندە اۋرۋ وشاقتارىندا سانيتاريالىق-ەپيدەمياعا قارسى ءىس-شارالارىن جۇرگىزىپ، ناۋقاستارمەن بايلانىستا بولعان ازاماتتاردى تىركەۋگە الدى. تاماقتان ۋلانۋدىڭ، ءبوتۋليزمنىڭ الدىن الۋ ماقساتىندا سانيتاريالىق اعارتۋ جۇمىستارىن جۇرگىزدى. قازىرگى تاڭدا ادام دەنساۋلىعىنا زيان كەلتىرگەن وقيعا بويىنشا زەردەلەۋ جۇمىستارى جالعاسۋدا.  

ايتىپ وتەيىك، 2023 جىلى وڭىردە 4 ادام بوتۋليزممەن اۋىرعان بولاتىن. 

وبلىستىڭ سانيتارلىق دارىگەرلەرى تۇرعىنداردى كونسەرۆىلەنگەن سالاتتار مەن تۇزدىقتاردى تۇتىناردا، دۇكەندەردەن ساتىپ الاتىن تاعامداردىڭ جاسالۋ تەحنولوگياسى مەن دايىندالعان مەرزىمدەرىنە اسا ءمان بەرۋگە شاقىرادى!