قازاقستاندا جازدا ەلەكتر مەن جىلۋ ەنەرگياسى قىمباتتاۋى مۇمكىن.
بۇل تۋرالى ق ر ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، بيىل ەلەكتر ەنەرگياسىنىڭ ءتاريفى شىلدە ايىنان باستاپ كوتەرىلمەك.
«كەيبىر وڭىرلەردە 10 پايىزدان باستالىپ، 30 پايىزعا دەيىن كوتەرىلۋى مۇمكىن»، - دەدى ءا.قۋانتىروۆ ماجىلىستە تىلشىلەر سۇراعىنا جاۋاپ بەرە وتىرىپ.
بۇل تۇرعىدا جىلۋدىڭ جاڭا ءتاريفى جاڭا جىلۋ بەرۋ ماۋسىمىنان باستالادى. تاريف مولشەرى ءار وڭىردە ءارتۇرلى بولادى.
ۆەدومستۆو باسشىسى تۇرعىن ۇي-كوممۋنالدىق شارۋاشىلىعىندا جۇمىس ىستەپ جۇرگەن ادامداردىڭ جالاقىسىن كوتەرۋ كەرەك ەكەنىن ايتتى. سەبەبى بۇل سالادا جالاقى از بولعاندىقتان، ماماندار جۇمىستان كەتىپ جاتىر.
مينيستر ەلىمىزدىڭ اۋماعىندا جىلۋ بەرۋ جەلىلەرى 85 پايىزعا دەيىن توزعانىن ايتا كەلە، بۇل سالاداعى ماسەلەنى شەشۋ باعىتىندا ءتاريفتى كوتەرۋ ەسكەرىلگەنىن جەتكىزدى.